Trátase dun medio de pago que, usando tecnoloxía ‘contactless’, permitirá acceso a todos os servizos vinculados coa administración local. Nun primeiro termo, a tarxeta vai funcionar co transporte urbano pero progresivamente estenderase ao resto dos servizos municipais e incluso a outros como poderían ser os taxis, interesados en formar parte desta iniciativa.
A Pass Vigo pretende proporcionar comodidade ao cidadán, xa que unificará nun mesmo sistema de tarxeta moedeiro varios documentos como o carné da biblioteca ou o carné das instalacións deportivas, entre outros.
A expedición da primeira alta da tarxeta, así como a renovación ou cambio de perfil asociado, serán de balde. A solicitude poderá realizarse fisicamente ou telematicamente e o prazo de entrega será dun máximo de dez días. O usuario debe manifestar na solicitude de alta os servizos municipais que desexa incluír no seu perfil.
A web para solicitar o documento xa entrou en funcionamento pero o Concello enviará entre o 18 e o 22 de decembro as primeiras 35.000 tarxetas, as correspondentes a pensionistas, estudantes, universitarios e usuarios do bono social. Entre o 15 e o 19 de xaneiro, distribuiranse outras 65.000, neste caso para os usuarios da tarxeta verde. Deste xeito a partir do 19 de xaneiro haberá 100.000 tarxetas operativas.