Luís Bará, número un ao Congreso pola provincia de Pontevedra, encabezou así o seu discurso en Vigo na presentación da candidatura de BNG-Nós á Cámara Alta e Baixa en Madrid. “Nos últimos meses, dende as últimas eleccións, cambiaron moitas. Só presenciamos un espectáculo vacuo e pobre da política madrileña sen unha representación galega. Nós queremos ir a Madrid para ser protagonistas, non para ser figurantes e comparsa dun espectáculo ridículo e cutre. O noso país merece respecto”, dixo.
“Imos facer unha campaña de ideas, pero tamén de sentimentos e valores: o orgullo, a dignidade e o compromiso con Galiza”, sinalou Bará, para engadir que o BNG é unha resposta para todos aqueles “decepcionados con ese espectáculo madrileño que non atendeu as necesidades do país e para aqueles con sentimento nacionalista que quedaron orfos de representación, fronte ás cinco lexislaturas nas que o BNG estivo en Madrid para traballar polos galegos e galegas”.
Bará destacou que o país debe ter confianza nas súas potencialidades. “Galiza é un país rico con multitude de iniciativas e de proxectos que saen adiante a pesares de atrancos”, salientou, e fixo referencia á comarca de Vigo e a sectores e empresas punteiras que están a desenvolver os seu traballo a pesares das dificultades. “Se nos deixan producir o país poderá saír adiante, pero somos as forzas galegas 100% as únicas que imos buscar solucións para os nosos problemas”, dixo.
Por último, o candidato por Pontevedra finalizou asegurando que “debemos defender o respecto para o noso país. No BNG imos defender a nosa dignidade e orgullo. Iremos a todas partes para defender esas ideas, valores e sentimentos que imos poñer por diante para que Galiza estea representada en Madrid”.
Voz aos problemas de Vigo e Pontevedra
Pola súa banda, a voceira nacional do BNG, que se trasladou a Vigo para arroupar aos candidatos ao Congreso e ao Senado, asegurou que o equipo que se presenta para o 26X “ten convicción e forzas renovadas para continuar o labor feito durante 20 anos en Madrid”. Lembrou ás iniciativas e traballo constante da parlamentaria Olaia Fernández, “que deu voz aos problemas de Vigo e Pontevedra sabendo que ese era o seu mandato, demostrando unha grande entrega”.
Subliñou que en Galiza “hai alternativas diferentes ás que expoñen os de Madrid, onde as chamadas forzas do cambio tampouco foron quen de poñerse de acordo. Nós queremos representación para Galiza sen dependencia de Madrid”.
Pontón aproveitou para explicar que na mañá de este venres a ministra de Fomento confirmou que non vai apoiar a transferencia da AP-9. “. Para nós a transferencia da AP-9 é unha prioridade. Ana Pastor é a ministra que máis subiu as peaxes do noso país, onde temos os salarios máis baixos. É a principal responsable política desta situación e preséntase como cabeza de lista dunha formación. Hai que dar unha resposta nas furnas e ser quen de xestionar dende aquí a nosa riqueza. Temos que rematar cos espolios e os abusos e defender os intereses e as potencialidades do noso país”, subliñou.
Pola súa banda, Alba Cuba, candidata ao Senado, sinalou que nos últimos meses “primaron as políticas personalista e partidistas e o acadado nos últimos 20 anos de representación do BNG en Madrid esmoreceu”. “Temos unha oportunidade de volver a ter voz propia. O pobo galego vai estar no Congreso só se o nacionalismo está. O BNG será a representación para levar os problemas do día a día do noso país, non para premer un botón ás ordes dos capitáns madrileños”, subliñou.
Xunto a Luís Bará e Alba Cuba na súa presentación como cabezas de lista en Vigo estiveron todos os membros da candidatura (Segundo González, Miriam Rodríguez, Marta da Costa, Xosé Collazo, Olalla Obelleiro, Antón Merayo e Cecilia Tarela), agás Ana Miranda, a número dous, á que a folga de avións convocada en Francia fixo imposible a súa volta dende Bruxelas para asistir ao acto, tal e como estaba previsto. Así mesmo, para arroupar a candidatura estiveron tamén presentes alcaldes e concelleiros do BNG de toda a provincia.