O alcalde de Vigo, Abel Caballero, destacou este mércores nos actos da Reconquista que a cidade sempre foi e sempre será forte ante os seus agresores. «Vigo non admite nin conquistas nin tutelas, ningún intento por arrebatarle algo triunfou», dixo durante a homenaxe aos heroes da Reconquista na Praza da Independencia.
Rodeado de autoridades civís e militares, o rexedor vigués insistiu na idea de que Vigo avanza con fortaleza. «Vigo é hoxe un exemplo para outros municipios de España. Avanza mentres outras moitas cidades están paradas e todo o que depende exclusivamente de nos segue adiante. Estamos saíndo da crisis fortalecidos e unidos», sinalou.
No acto, no que se celebra o triunfo sobre as tropas napoleónicas e a liberación da cidade en marzo de 1809, estivo presente gran parte da Corporación Municipal -excepto representantes de Marea de Vigo- o Valedor do Cidadán, o exalcalde Manoel Soto, a decana de Ciencias do Mar, a presidenta de Cruz Roja e mandos da Policía Nacional, Guardia Civil, Policía Local e o Comandante Naval.
Pola súa banda, o maxistrado Julio Picatoste destacou no seu bando a defensa da democracia, a liberdade e a xustiza. «E que é, ao cabo, todo isto senón a loita pola dignidade, que é filla da xustiza e da liberdade. Non outra cousa fixeron os nosos antepasados naquela fazaña que rememoramos agora: combatían polo que en xustiza lles pertencía, e, con iso, pola dignidade que corresponde a un pobo libre. Mirando aos nosos días, a esas loitas que aínda temos pendentes, podemos dicir que as formas e as causas cambiarán; a esencia non», sinalou.