O vicepresidente da Xunta, Alfonso Rueda, acompañado do delegado territorial da Xunta en Vigo, Ignacio López-Chaves asistiu á reunión da Comisión de Seguimento do Proxecto da Cidade da Xustiza de Vigo, que tivo lugar na Delegación da Xunta, onde indicou que esta elevada incorporación das alegacións dos colectivos máis involucrados no proxecto, amosa o talante construtivo e dialogante da Xunta de Galicia á hora de involucrar a tódolos organismos neste proxecto. Así, coa incorporación destas alegacións haberá máis despachos; máis áreas para vítimas e menores; e máis zonas de atención públicas.
Nesta liña, para axilizar a posta en marcha do edificio, a Xunta de Galicia, unha vez recibida este luns, a licenza por parte do Concello de Vigo, procederase a adxudicar a primeira fase da obra cun orzamento de 3,2 millóns de euros, que consiste na demolición daquelas partes do edificio do antigo Hospital Xeral que serán retiradas, para que as obras dean comezo de inmediato na segunda quincena de maio, cun prazo de execución de 5 meses. A continuación darase comezo coa segunda fase de rehabilitación que ten un prazo de 24 meses, sempre co obxectivo principal de que o edifico sexa unha realidade antes de rematar 2019, cun investimento global que roldará os 25 millóns de euros.
Dende a Xunta apostouse por rehabilitar un edificio emblemático da cidade, concentrando nun mesmo sitio todas as dotacións xudiciais da cidade, poñendo en marcha unha Cidade de Xustiza moderna, ben dimensionada, e buscando mediante o concurso de ideas a mellor solución para converter o antigo Xeral na nova Cidade da Xustiza de Vigo, concentrando nun mesmo edificio todas as dotacións xudiciais da cidade, gañando máis de 20.000 metros cadrados novos de espazo e situando no inmoble 35 unidades xudiciais, con espazo libre para futuras ampliacións, contando xa dende o primeiro momento coa axuda e co asesoramento dos arquitectos da cidade, dos operadores xudiciais e do concello.
«Un día importante»
Pola súa banda, o concelleiro David Regades valorou esta xornada como un «día importante» para Vigo xa que pode iniciarse o desenvolvemento da Cidade da Xustiza, un proxecto que conta co «apoio total e inequívoco» do Concello, que «fixo os deberes e traballou arreo para cumprir os prazos de concesión» das licenzas necesarias para o derrubamento de distintos espazos do inmoble.
O segundo tenente de alcalde explicou que o goberno de Vigo lle entregou hoxe unha copia da licenza de demolición ao equipo técnico «para que pidan empezar os traballos en canto estean contratados» e insistiu no vontade de «cooperación total» coa Cidade da Xustiza e cos proxectos futuros que se desenvolvan para darlle utilidade aos edificios da rúa Lalín. Así, apuntou que na Comisión celebrada esta mañá a administración autonómica anunciou que pediría colaboración para «intentar ir todos da man con ese novo proxecto» que contará, engadiu Regades, coa colaboración municipal.
Ademais apuntou que na xuntanza se puxeron sobre a mesa dúas demandas para a nova Cidade da Xustiza: unha sala de autopsias e unha gardería, que non están incluídas no proxecto, e que o Concello apoiará «sempre que encaixen no proxecto presentado polo arquitecto Alfonso Penela.