Segundo informou, o Concello de Vigo remitiu o pasado 9 de abril o expediente, que tivo entrada por rexistro na Delegación Territorial de Pontevedra dous días máis tarde. O representante autonómico chamou así a atención sobre o feito de que o alcalde afirmara o día 13 que a mellora non precisaba dun informe preceptivo cando a Concellería de Fomento xa entón o remitira.
“Ou o alcalde mentiunos aos vigueses ou non sabía que a Concellería de Fomento xa enviara o informe a Patrimonio”, aseverou ao tempo no que fixo fincapé na necesidade de completar a autorización ante a Dirección Xeral de Patrimonio Cultural, por atoparse o ámbito de actuación nun entorno de protección de bens catalogados e cuxa existencia, sinalou, “recoñece o propio proxecto”.
O delegado territorial incidiu así en que é a Lei de Patrimonio Cultural de Galicia (5/2016 do 4 de maio) a que esixe o informe da autoridade competente e, polo tanto, “desde a Xunta limitámonos a cumprir a normativa vixente”.
López-Chaves afirmou que o envío do expediente supón primeiro, que si era necesario o informe de Patrimonio; en segundo lugar, que o Concello así o pediu pese a que o alcalde dixera o contrario e, xa por último, que o rexedor “mentiu aos vigueses ao afirmar que non era necesario”.
Xa para rematar, e preguntado polo proceso do expediente, sinalou que serán agora os técnicos da Dirección Xeral de Patrimonio Cultural os encargados de examinar o proxecto, valoralo e emitir o preceptivo informe.
Resposta do Concello de Vigo
Tras as declaracións do delegado da Xunta de Galicia en Vigo, o goberno local emitíu un comunicado no que destaca que quere «reiterar que esta obra non precisa de informe de Patrimonio, tal e como ditaminaron os técnicos municipais».
«O Goberno de Vigo remitiu este proxecto á Xunta de Galicia para o seu coñecemento, en ningún caso para pedir o permiso da administración autonómica. Así, cando unha obra require dun permiso de Patrimonio, envíase o proxecto e solicítase de forma expresa a súa autorización previa, tal e como pódese comprobar nos documentos que achegamos (a comunicación da Gran Vía e, a modo de exemplo, a solicitude de autorización para a humanización da Avenida das Camelias). A Xunta de Galicia volve mentir, pretende enganar á cidadanía e o señor López-Chaves, sinxelamente, non se entera», conclúe o comunicado.