Baixo o nome de ‘Apaixonante. Rutas en moto, sinte Rías Baixas’, a guía repartirase nas oficinas de turismo da institución provincial e tamén entre os clubs de motoristas de todo o Estado. O catálogo, que tamén estará dispoñible na páxina web www.turismoriasbaixas.com, propón catro rutas distribuídas ao longo de toda a provincia para gozar da beleza natural e da cultura milenaria de Pontevedra.
A primeira das rutas é a ‘Ruta Costa longa’, que transcorre entre A Guarda e Catoira. Deste xeito, sinalou o responsable de Turismo da Deputación, Santos Héctor, os motoristas coñecerán «os muíños do Folón e do Picón, as Pozas de Mougás, os concellos de Baiona, Vigo, Redondela, Pontevedra e Sanxenxo, a praia da Lanzada, O Grove, a Illa da Toxa, Cambados, A Illa de Arousa e Vilagarcía de Arousa», ademais dos concellos de inicio e de chegada.
O segundo dos traxectos é a ‘Ruta Costa curta’, nesta ocasión entre Baiona e Pontevedra. Dentro do seu trazado os e as apaixonadas das motos poderanse deter «nas praias de Panxón, Patos e Prado, ademais de nos concellos de Vigo, Moaña e Cangas, onde poderán visitar Cabo Home mailo núcleo de Aldán, e tamén as vilas de Bueu e Marín», asegurou o deputado delegado de Turismo.
A terceira proposta chámase ‘Ruta Interior-Costa’ e parte da Cañiza para chegar á Guarda. As persoas que escollan esta opción poderán coñecer os concellos de Arbo, Salvaterra de Miño, Tui e a parroquia de Goián, en Tomiño.
A cuarta e última suxerencia, baixo o nome de ‘Ruta Interior’, transcorre entre os concellos de Silleda e Poio. Tras deixar atrás lugares como o mosteiro de Carboeiro ou a fervenza do río Toxa, pasarán por Lalín, Forcarei e Pontevedra para chegar ata o punto de chegada co conxunto histórico de Combarro como protagonista.
Héctor sinalou que «no folleto inclúense os mapas de cada unha das rutas propostas, con información turística detallada de cada unha das localidades polas que transcorren».
Ademais, tamén «algunhas pistas de actividades que se poden facer detendo unhas horas a motocicleta, como visitar as Illas Cíes, escapar ata Cabo Udra, bañarse na praia fluvial de Goián ou percorrer a senda do río Lérez, na capital pontevedresa».
A maiores, a guía tamén «facilita unha serie de consellos para facer viaxes longas en moto, que indican cuestións que se deben ter en conta antes de saír e tamén durante a viaxe».
A blogueira motorista Alicia Sornosa plasmará as rutas nunha guía online
Para a presentación da guía, a Deputación de Pontevedra contou coa presenza da xornalista, blogueira e motorista Alicia Sornosa, «que xa pasou á historia por ser a primeira muller de fala hispana en dar a volta ao mundo en moto».
Sornosa, colaboradora da guía Repsol con 33.000 seguidores en Facebook e 7.000 en Youtube, está a percorrer a provincia de Pontevedra neste medio de transporte co obxectivo de «dar a coñecer o interesantes que son as Rías Baixas para visitalas a dúas rodas».
A xornalista asegurou que «esta guía é marabillosa» e admirou a idea de «contar co turismo en motocicleta, xa que somos xente á que nos gusta rodar, coñecer, ulir, comer e Galicia e as Rías Baixas son un dos tesouros que temos e que debemos coñecer máis».
Ademais, sinalou que «débese facilitar o turismo en motocicleta para facer que creza, pero tamén facilitarnos como ir, que é o máis complicado porque saímos moito das autoestradas xa que preferimos estradas secundarias nas que podernos parar a gozar das paisaxes e os lugares».