«O galego, garantía de futuro» é o lema elixido este ano para as mobilizacións do Día das Letras Galegas, no que se lembra que «o galego ten pasado e presente pero tamén un futuro, sendo a máis grande obra colectiva do pobo galego que non desaparecerá mentres non deixemos de usalo, mentres reivindiquemos a súa normalidade e actuemos no noso día a día para revitalizalo».
Na convocatoria das mobilizacións, a plataforma lembrou «o decretazo contra o idioma, as reformas na administración, a limitación de recursos que permitan usalo na xustiza, na sanidade; malia a continua utilización de toponimia deturpada no transporte e sinalización en estradas, vilas e cidades; malia a súa exclusión da igrexa ou de empresas que reciben abondosas axudas públicas; malia todas as dificuldades e exclusións forzosas que nos limitan para vivirmos nel con absoluta normalidade, usámolo sempre, en todo e para todo, facéndoo por nós útil e vivo».
«Mantémolo a pesar de termos un goberno que a través dun decretazo reducíu a súa presenza no ensino ou o prohibiu para as matemáticas, a física, a química e a tecnoloxía. Mantémolo aínda que por acción ou omisión a Xunta néganos a posibilidade elemental de recibirmos, ou mesmo de optarmos polo galego no audiovisual, na dobraxe, no lexendado de filmes e series, nos servizos de atención telefónica, na etiquetaxe, na formación profesional a distancia ou na formación de adultos, na administración electrónica, na xustiza ou na saúde, nos xoguetes e xogos infantís e xuvenís».
Queremos galego!,que alerta do grave risco que supón para o idioma o feito de que a xente nova non priorice o seu uso, reclama accións concretras por parte da Administración como as xa aprobadas hai dez anos no plan xeral de Normalización da Lingua Galega «sobre as que só tivemos retrocesos».
Mobilizacións do 17 de maio de 2015:
Vigo: Cruce da Vía Norte con Urzaiz (12.00 horas)
Santiago: Praza das Prataría (12 h)
Ferrol: Praza do Cruceiro (Canido) (12 h)
A Coruña: Diante do Teatro Rosalía (Rego da Auga) (12 h)
Pontevedra: Praza da Peregrina (12 h)
Lugo: Praza Anxo Fernández (tras o concello) (11:30 horas)
Ribadeo: Catro Rúas (12 h)
Ourense: Praza da Imprenta (12 h)