A directora xeral de Mobilidade, Helena de Lucas, asinou os convenios coas navieras que operan actualmente nos servizos regulares na ría de Vigo, as compañías Mar de Ons, Rías Gallegas e Nabia, co fin de incorporar os desprazamentos marítimos entre Cangas e Moaña e Vigo ao plan de transporte metropolitano.
Mediante estes acordos de colaboración queda garantido que os usuarios con Tarxeta de Transporte Metropolitano aboarán 1,30 euros nos seus desprazamentos desde Moaña e Cangas a Vigo e viceversa
Ademais, os viaxeiros accederán ao resto de beneficios que supón o Plan tales como os transbordos gratuítos entre servizos adheridos ou descontos adicionais para familias numerosas e para aqueles que viaxen cunha maior frecuencia, que poderán usar o transporte de ría por tan só 1,10€ por traxecto. Deste modo, de acordo co convenio, un usuario de Aldán que vaia a Cangas e, desde aí, ata Vigo, coa Tarxeta Metropolitana pagará por toda a viaxe tan só 1,30 €, baixando a 1,10 € se fai máis de 40 viaxes metropolitanas ao mes.
Incorporacións futuras
Por outra parte, a porta queda aberta á incorporación no futuro doutras navieras que queiran operar en calquera dos dous corredores cuxos servizos se prestan en réxime de libre concorrencia.
Logo da formalización destes convenios de colaboración acádase un dos últimos requisitos para a posta en marcha do plan, co que, rematadas as adaptacións técnicas das canceladoras que se están instalando, tanto nos barcos como nos autobuses, e as probas que se levan facendo nas últimas semanas, nos próximos días comunicarase xa a data definitiva para o inicio da súa aplicación, así como o momento a partir do que xa se poderá adquirir a Tarxeta Metropolitana nas oficinas subministradoras de Abanca.