A Marea de Vigo considera que hai que abrir o debate social sobre que necesidade de espazo público precisa Vigo e apunta que esa decisión condicionaría o concurso de ideas arquitectónico para o edificio da Panificadora, polo que reclama unha convocatoria do Consello Económico e Social para artellar ideas sería o idóneo.
«As profundas eivas en dotacións públicas dirixidas ao tecido asociativo da cidade, dende locais propios a espazos de uso común, requiren que o Concello priorice determinados usos da antiga panificadora antes de abrir o concurso de ideas arquitectónico xa que, non é o mesmo rehabilitar un espazo industrial para ser un centro comercial que unha biblioteca ou auditorio público», apunta a Marea nun comunicado de prensa.
Tamén opina o grupo municipal que un escenario para trasladar propostas e abrir o debate cidadá pode ser o Consello Económico e Social da cidade, xa que pode chegar a un consenso máis amplo e representativo que unha comisión paritaria “monocolor” do concello e da Zona Franca.
«Existe toda unha serie de demandas históricas do movemento asociativo de Vigo expresadas ao longo dos anos que poden ser perfectamente acubilladas no futuro contedor da Panificadora: dende a Casa da Solidariedade que nos anos 90 reclamaban diversas asociacións culturais, sociais, etc… ate un novo espazo veciñal cooperativo que dinamice o entorno do centro da cidade», indica a Marea de Vigo.
A grupo sinala que podería ser o lugar para unha biblioteca estatal ou mesmo dependencias municipais que permitan ampliar os espazos dos diversos servizos municipais limitados pola falla de espazo no edificio actual. «O que si que hai que descartar xa son proxectos arquitectónicos froito doutra época deste país no que os Calatrava ou os Moneo poñían nun papel un proxecto sen ter en conta os custes de edificación ou mesmo os usos máis aló do “aspecto arquitectónico”, engade.