Os 470.000 trámites foron feitos por 110.000 cidadáns e 10.000 empresas. Ademais, tamén houbo un total de dous millóns de consultas e dous millóns de visitas á páxina oficial vigo.org.
«A tramitación electrónica supón un grande aforro e mellora da competitividade para a cidadanía, empresas e administración», explicou o rexedor antes de apuntar que o sistema evita que teñan que ser impresos un millón de documentos ou facer 500.000 desprazamentos na cidade, o que supón 400 toneladas de CO2.
«Estes datos poñen de relevo que somos un dos concellos que máis utilización teñen dos sistemas electrónicos e, por exemplo, as tramitacións en Urbanismo evitan decenas de metros de papel para imprimir planos», engadiu.