Así o confirmaron este mércores os coordinadores principais do chamado Proxecto Hygia, o catedrático da Escola de Enxeñería de Telecomunicación, Ramón Hermida, e o coordinador da Unidade Compartida de Investigación de Atención Primaria, Juan Crespo, no transcurso dunha rolda de prensa na que tamén estiveron presentes o xerente da EOXI de Vigo, Félix Rubial; e a vicerreitora de Investigación da Universidade de Vigo, Belén Rubio.
“O feito de que esta revista publique o estudo está revolucionando o mundo científico dado as posibles consecuencias clínico asistenciais sobrevidas en relación co diagnóstico, prognóstico e orientación terapéutica da hipertensión arterial e risco cardiovascular; isto é, as conclusión deste estudo marcarán un antes e un despois no enfoque clínico destas patoloxías”, afirma o doutor Juan Crespo.
A principal conclusión que os investigadores obtiveron en todos estes anos de traballo é moi clara. O risco cardiovascular está asociado coa elevación da presión arterial durante o sono, con independencia de que a presión medida na consulta médica ou cando o paciente estea esperto sexa normal ou alta.
Ademais, o estudo demostra que reducir a presión durante o sono co tratamento antihipertensivo reduce de forma significativa o risco de eventos cardiovasculares, converténdose así nun novo obxectivo terapéutico.
Esta nova definición de hipertensión verdadeira baseada na presión durante o sono e o perfil circadiano (variación da presión arterial ao longo das 24 horas) indica que o 47% dos pacientes está mal diagnosticado.
Tratamentos máis efectivos pola noite
Outra das principais conclusións do estudio e que o risco cardiovascular nos pacientes con hipertensión diminúen considerablemente cando se lles administra a medicación pola noite, no momento de deitarse a descansar, en lugar de tomala cando se levantan.
Neste senso, Ramón Hermida afirma que “temos demostrado que as posibilidades de sufrir un accidente vascular, como un infarto, insuficiencia cardíaca ou ICTUS, se reducen nun 53% cando o tratamento hipertensivo se toma pola noite en vez de pola maña”.
As conclusións son o resultado de 11 anos de investigacións, nas que se estudaron a 18.078 pacientes, cunha media de seguimento de 5 anos por paciente. “Trátase do maior estudo de risco cardiovascular prospectivo realizado nunca”, engade o investigador.
Este estudo é especialmente significativo dada a alta prevaleza da hipertensión na poboación, que afecta a un 40 por cento da mesma, incrementándose nos rangos de maior idade, chegando a afectar ao 70 % dos nosos maiores.
O grupo de traballo que participou no Proxecto Hygia estivo composto por 292 investigadores de 40 centros clínicos, dos que un 70 por cento son centros de saúde do sur de Galicia.
Monitorización da presión arterial
Aos pacientes incluídos neste estudo se lles realizaban unhas probas consistentes nun seguimento mediante unha Monitorización ambulatoria da presión arterial (MAPA). É un aparato que se entrega ao paciente no centro de saúde e que ten que levar durante dous días para que cada 20 ou 30 minutos lle mida a súa tensión. Tratábase dunha medición continuada durante todo o día, o que permitiu identificar aos investigadores que o risco cardiovascular está asociado a elevación da presión durante o sono e non cando o paciente está esperto.
O MAPA debe ser a forma requirida de diagnóstico da hipertensión, sobre todo en persoas de maior risco, incluíndo os maiores de 60 anos ou pacientes con diabetes ou enfermidade renal crónica, a fin de previr riscos cardiovasculares.
O Proxecto Hygia supón, ademais, unha proba da viabilidade e eficiencia de implementar unha rede para a incorporación progresiva da MAPA nos centros de Atención Primaria que, mediante un informe estandarizado como o utilizado neste estudo, permite mellorar o diagnóstico de hipertensión verdadeira, avaliar a resposta ao tratamento, e reducir a prevaleza dos eventos cardiovasculares.
Varios premios internacionais
As concusións desta investigación xa fóronse avanzando segundo coñecíanse os resultados parciais da observación dos pacientes nos últimos anos, o que valeulle ao grupo investigador varios recoñecementos e premios en distintos congresos nacionais e internacionais.
“Eses premios, e conseguir a publicación do artigo nesta revista, é un recoñecemento ao traballo ben feito, e esperamos que esta investigación sirva para cambiar determinadas prácticas á hora de administrar os medicamentos aos pacientes con hipertensión arterial. De feito, xa hai países que optaron pola alternativa de medicar a estes enfermos pola noite, xa que os medicamentos demóstranse moito máis eficaces cando actúan durante o período de descanso e de soño do paciente”, insisten os coordinadores desta investigación.