Segundo explica a responsable da Unidade, a doutora Rosa Mallo “a unificación de toda a cirurxía neste centro permitiu completar e incrementar a carteira de servizos e técnicas cirúrxicas, incorporando procedementos como a cirurxía radioguiada, o lipofilling e a reconstrución mamaria. Ademais, a formación dos cirurxiáns, a dedicación e organización da Unidade permite que hoxe en día máis do 65 por cento das mastectomías sexan reconstruídas no momento das intervencións”.
Nesta Unidade realízanse anualmente máis de 10.100 mamografías, 6.900 ecografías e 1.000 biopsias guiadas por imaxe. A estas cifras hai que engadir 7.100 consultas médicas e 4.000 de enfermería, así como as case 500 intervencións cirúrxicas. Os profesionais diagnostican 350 casos novos de cancro de mama ao ano.
Estes datos de actividade foron presentados este mércores no transcurso dun evento organizado para conmemorar o Dia Mundial contra o Cáncer de mama, no que os profesionais do Meixoeiro, acompañados por pacientes da Unidade, quixeron mostrar o seu compromiso na loita contra esta enfermidade lanzando globos de cor rosa ao ceo.