«É lamentable que tendo unha central de esterilización pública, acreditada e con profesionais competentes, nos vexamos, desde que se iniciou o traslado ao novo hospital, con continuos problemas co material, que ocasionan reiteradas suspensións de intervencións cirúrxicas», apunta o sindicato CIG nun comunicado de prensa.
Segundo explica CIG-Saúde, «a falta absoluta de previsión da Xerencia da EOXI de Vigo ocasionou que a central de esterilización antiga, que funcionaba, deixara de facelo antes de ter montada e en pleno funcionamento a nova central de esterilización. Esta nova central ten que funcionar coas máximas garantías e as traballadoras e traballadores deben estar preparados para o uso das novas tecnoloxías implantadas».
A central sindical tamén apunta ao elevado número de baixas entre o persoal sanitario. «Os profesionais de esterilización coas dúas centrais funcionando a medias e con evidentes problemas para optimizar o funcionamento da nova, son insuficientes para sacar o traballo adiante o que fai que a metade da plantilla se atope en situación de baixa laboral pola presión á que está sometida», afirma.
«Desde CIG-Saúde demandamos que un aspecto tan crítico e que condiciona a asistencia sanitaria da nosa área como é a esterilización sexa unha prioridade, e no canto de contratar coa sanidade privada, se invista en persoal e medios que permitan a correcta posta en marcha da nova central de esterilización de acordo cos estándares e certificacións que garantan que as intervencións se fagan nas mellores condicións, pois o que está en xogo é a saúde de todas e de todos», conclúe a CIG.