O ditame da XXXIIIª edición do Premio Xerais de Novela, a VIIIª edición do Premio Jules Verne de Literatura Xuvenil e a XXXIª edición do Premio Merlín de Literatura Infantil, os tres premios dotados con 10.000 euros cada un deles, anunciouse este sábado na Illa de San Simón.
Despois da súa última deliberación, o xurado acordou por maioría declarar como gañadora do Premio Xerais de Novela a obra presentada baixo o lema «Comasio» que, despois de aberta a plica, resultou ser de Manuel Esteban Domínguez e corresponde ao título «A ira dos mansos».
No caso do Jules Vernes de Literatura Xuvenil a gañadora foi á obra presentada baixo o lema «Murnios», que, despois de aberta a plica, resultou ser de Iria Misa Peralba e corresponde ao título «Xa non estou aquí».
E no Merlín de Literatura Infantil o premio foi parar á obra presentada baixo o lema «Os nomes», que, despois de aberta a plica, resultou ser de David Pérez Iglesias e corresponde ao título «Todo o tempo do mundo».
A festa literaria consistiu nun acto literario-musical, celebrado no Auditorio da illa de San Simón. Á velada asistiron arredor de trescentas persoas, entre as que se atopaban Cesáreo Sánchez Iglesias, presidente da AELG; Xosé Antonio Perozo, presidente de GALIX; Xosé Ballesteros Rei, presidente da Asociación Galega de Editoras; Antón Pedreira, vicepresidente da Federación de Librarías de Galicia; Bieito Ledo Cabido, presidente da Fundación Premios da Crítica Galicia; Xabier Alonso, concelleiro de Cultura, Turismo e Novas Tecnoloxías de Redondela; Xoaquín Fernández Leiceaga, candidato do PSdeG-PSOE á Xunta de Galicia, ademais de escritoras, editoras, libreiras, críticas, bibliotecarias, profesoras e outras persoas colaboradoras da editorial. O acto foi emitido en directo por Internet.