Como arranque da festa, este 1 de marzo, festivo local en Baiona, a praia Ribeira acollerá o espectáculo ‘El Presagio’, no que o druída Haemus anunciará a todos os habitantes da Vila unha predición: a inminente chegada dun navío cunha noticia que cambiará o seu mundo para sempre. Trátase dun espectáculo de Pablo Méndez Performance que abrirá estelarmente as actuacións medievais desta Arribada.
O Real Mercado Medieval da Arribada, que espera a 150.000 persoas ao longo dos tres días, estará composto por 71 postos individuais de venda de artesanía situados no casco antigo; 70 postos propios de comida e artesanía situados na rúa Marqués de Quintanar e Santa Liberata; 37 postos de establecementos da vila que ocupan a fachada do seu propio negocio, 16 asociacións gremiais, situadas en Santa Liberata, e 6 Paradas dos Pobos Irmáns (Palos de la Frontera, Santa Fe de la Vega de Ganada, Pornic, Vila do Bispo e Baiona), todos eles con produtos típicos das súas zonas. En total, uns 200 postos.
Entre as novidades destaca o Alpendre dos Bois, unha mostra etnográfica sobre a vida do boi en Galicia, carros, arados, apeiros de labranza e instrumentos agrícolas de diversa índole. Tamén a Morada de Otto o Dragón e as Aves Xurásicas, un recuncho situado no Paseo Ribeira onde descansa o dragón e as aves que durante o mercado sairán a pasear polas rúas.
Outro atractivo é o Recuncho dos Monicreques na Rúa Carabela Pinta, no que os nenos e nenas darán renda solta á súa imaxinación da man dos contacontos e marionetas. Mentres, o Campamento Circense, tamén na Carabela Pinta, ofrecerá obradoiros onde aprenderán as habilidades motrices dos acróbatas, como as bólas malabares, o prato chinés, os zancos e o monociclo.
Do mesmo xeito, repetirán actividades que tanto éxito tiveron a edición pasada como a Alameda dos Aprendices, onde os máis pequenos poderán facer gravados de madeira, ourivaría, cerámica, repuxado de coiro, repostería, escritura gótica, acuñación de moedas, bordados e costura, tapices de época, lacrado, etc.
Tamén volve a zona de Playmobil Medieval na Rúa Carabela Pinta e que amplía o seu recinto, con castelos, piratas, bucaneiros, príncipes e princesas, damas e cabaleiros e multitude de personaxes Playmobil con que xogar, soñar e facer as delicias dos máis pequenos.
Os paseos de Camelos e Dromedarios seguirán na Praia Concheira e a zona chamada Terrario exótico O Centauro, onde nos atoparemos co encantador de serpes e as súas pitóns albina, atigrada, xaguar, a boa constritor e a anaconda. Tartarugas xigantes, a iguana, os guacamaios, os agapornis e os papagaios de cola vinagre. Tamén poderemos ver na súa Granxa Medieval pavos, patos, ocas, gansos, chamas, porco espíns, coellos, coballas, mapaches, raposos, burros e ponis. Unha actividade lúdica e educativa para os máis pequenos.
Exposicións e música
Como exposicións temáticas poderán visitarse ‘A historia da escritura e a imaxe impresa. Unha viaxe polo tempo’ na Biblioteca Pública e ‘Os Mesteres da Ribeira’ na Capitanía Marítima de Baiona, inaugurada ao finalizar a presentación, realizada conxuntamente por dous baioneses, o historiador Anxo Rodríguez Lemos, que achega mocidade e sabedoría, e o redeiro Remigio Leyenda, que achega a experiencia e veteranía. Poderase gozar tamén das mostras de ‘Encaixes de Palillos’ e dos ‘Labores de Calceta’ no Viveiro de Empresas situado na Rúa do Reloxo.
Haberá espazo tamén para os concertos de música relixiosa e profana do renacemento ‘Senhora do Mundo’ Camerata Più Bassa, a Banda de Música de Baiona, o grupo de gaitas A Seneira, as actuacións circenses e aéreas como Peronio Circus, las Tres Dimensiones, Meciendo el Aire, Entre Estrellas e Desafío a la gravedad a cargo de Leyenda Viva. Así mesmo, Troula Animación encargarase dos pasarrúas de bufóns, zancudos e malabares e Kepler T&T ofrecerá o seu espectáculo nocturno ‘Tenebrae’.
Non poden falta na Arribada a Cetrería, a Xusta Medieval, o Tiro con Arco, a Contenda de Esgrima, o Desafío Medieval con descensos en tirolesa, rocódromos, rappel, torre multi-aventura, equilibro no ponte mono, o Adestramento de Cabaleiros, as Atraccións Medievais e os quebracabezas de madeiras con xogos tradicionais de toda a vida.
Finalmente, o feito histórico, a representación da obra da ‘Arribada do Descubrimento’, obra escrita polo profesor e historiador Avelino Sierra e dirixida por Mónica Sueiro, terá lugar o domingo ás 18.00 horas cunha repartición de actores e figurantes coa dificultade que ten o feito de representala en directo no mesmo escenario que hai 526 anos.