Este xoves, 22 de maio, ás 19:30 horas, a Sala Municipal de Exposicións do Concello de Tui acolle a presentación do catálogo da exposición “Borders” do artista cordobés Jacinto Lara. A mostra foi inaugurada a pasada semana e pode visitarse en Tui até o 15 de xuño. Na presentación intervirán o propio artista xunto a Federico Castro Morales, o presidente da Fundación MBM (Move be Moved), que editou o catálogo que agora se presenta.
Esta publicación titulada como a propia exposición “Borders” é, en palabras do artista, unha bitácora expresiva do tránsito artístico que acompaña a súa translación vital dende a súa Andalucía natal a Galicia, entre El Quiñón (Córdoba) e Alxén (Salvaterra de Miño), onde instalou o seu taller e vivenda en 2024.
A concelleira de Cultura, Sonsoles Vicente Solla, sinala que esta exposición recolle unha escolma de pinturas e esculturas, entre outras creacións do autor cordobés que ten agora o seu estudo en Alxén – Salvaterra. Engade Sonsoles Vicente coma Jacinto Lara escolleu esta Sala de Exposicións tudense para ofrecer a súa primeira mostra en terras galegas, que agora coa edición deste catálogo adquire unha maior proxección e relevancia.
O Concello de Tui, en palabras da concelleira Sonsoles Vicente, agradece á Fundación MBM a súa colaboración con esta mostra de Jacinto Lara evidenciando o seu compromiso coa difusión da arte contemporánea. Sonsoles Vicente congratúlase pola celebración en Tui desta exposición na que as formas xeométricas das súas imaxes crean formas suxestivas e emotivos espazos que reclaman a atención do espectador.
Jacinto Lara
Jacinto Lara nace en Fernán Núñez (Córdoba) e a súa contorna natural esperta nel o interese polas formas, as texturas e as cores propias do cultivo na campiña cordobesa. A súa observación pronto se trasladará a unha pintura que trata de recoller esa riqueza paisaxística e cambiante. Tras anos de formación ecléctica dentro e fóra de España, Jacinto Lara regresa a Córdoba onde é acollido pola comunidade artística da cidade, tendo así a oportunidade de enriquecerse co labor desenvolvido polos membros do Equipo 57, a ceramista Hisae Yanase e o escultor Manuel Cabelo. Ademais, compartirá experiencias e traballos cos artistas da súa xeración Juan Zafra, Hachim Cabrera, e poetas e escritores do Grupo Cántico. De forma paralela, a súa actividade artística estará encamiñada a dinamizar a vida cultural da cidade a través de cursos, charlas, montaxe e coordinación de exposicións. O seu interese pola difusión da cultura e o desexo de que esta sexa alcanzable para todos, lévalle á cooperación en Nicaragua na Casa dos Tres Mundos (Selecta), co obxectivo de crear unha escola de arte.
A partir dos anos setenta comeza a expoñer en distintas cidades de España e Europa, cunha obra que reflicte un estilo moi figurativo con tinguiduras surrealistas ao que el mesmo denominará como “Incomunirealismo” (a non comunicación da realidade convencional). Nos oitenta, o seu interese desprázase cara aos campos de cor cunha plástica máis próxima ao expresionismo abstracto americano, sobre todo grazas ao artista granadino Guerrero. Nos noventa, o seu estilo evoluciona cara á abstracción xeométrica e ao interese polos fractales. Isto unido á súa fascinación por Oriente e os hayku o levan á realización das súas series sobre haykus e fractales que hoxe seguen ecoando na súa produción. Actualmente forman parte tamén do seu traballo as esculturas, as instalacións, a obra gráfica e a poesía.
