Abel Caballero fixo este xoves balance da súa xestión, cando se compren tres anos do actual mandato e 15 anos desde que é alcalde. Baixo o título “3+3 Vigo: cidade de éxito”, o rexedor debullou no Auditorio Municipal as principais actuacións desenvolvidas polo Concello neste período.
Segundo sostivo, supuxeron “un cambio sen precedentes en ningunha cidade de Europa en tan pouco tempo”. Arrancou referíndose á máis grande inversión da Historia, con 358,6 millóns nos últimos tres anos, unha cifra que permitiu humanizar 146 rúas, das que 94 xa están rematadas e 42 en marcha. Nos 3+3 (tres mandatos e tres anos), o número de rúas humanizadas elévase a 1.048, actuando en toda a cidade e primando zonas que nunca foran atendidas.
Outra das cuestións más relevantes no capítulo de investimentos son as “humanizacións 5.0”, as actuacións no Vigo Vertical, unha forma de resolver o problema orográfico da cidade. Ascensores ou ramplas mecánicas, todos os que xa están a funcionar e as que xa están previstas, desde o colexio Losada ata Ramón Nieto e ao Centro de Saúde de Lavadores; as ramplas de Escultor Gregorio; entre Camelias e Hispanidade, entre outras.
Respecto das dotacións deportivas, mellorouse o céspede e a iluminación do campo de fútbol do Vao; acometéronse reformas nos campos de Navia, Meixoeiro, Candeán, A Bouza, Bouzas, A Guía, Fragoselo, Monte da Mina, As Relfas Sárdoma e San Andrés de Comesaña. Construíronse os pavillóns de Quirós, Romil e os dous dos baixos de Balaídos. Mención aparte merece este estadio municipal, que está a ser remodelado integralmente co apoio económico exclusivo de Concello e Deputación.
No capítulo de investimentos non esqueceu as cubricións e reformas de patios de colexios e zonas de xogos, a ETA -cun orzamento de 25 millóns de euros, os aparcamentos de Matamá e das piscinas de Teis; as melloras no túnel de Beiramar, o paseo marítimo de Bouzas; melloras de eficiencia enerxética, como a instalación de 14.410 novas luminarias LED, co conseguinte aforro en consumo e menos emisións; a construción do aparcamento municipal do Álvaro Cunqueiro; ou a instalación de 5.000 bancos, unha cuestión moi importante para unha gran parte da cidadanía xa que lle permite saír á rúa con tranquilidade.
Desde o ano 2007, a cidade conta con 143 novos parques, 83 deles reformados nos últimos tres anos, aos que se sumarán en breve o da Finca Matías, o de García Picher e o da rúa Coruña. Parques de grandes dimensiones como Castrelos, Teis, Venezuela, Navia, Barreiro, Praza Independencia, Bouzas e o Castro; ademais de 70 áreas bio-saudables. Skatepark en Barreiro, Navia, Calvario e O Castro e renovación e nova construción de pistas deportivas para as “pachangas”.
Limpeza e medio ambiente
Vigo conseguiu esta semana a súa oitava escoba de platino, o que a converte na cidade española con máis distincións pola limpeza das rúas. Conseguiu a primeira en 2008, e desde entón recibe unha cada dous anos, dado que é un recoñecemento bianual.
Na súa intervención, Caballero destacou que Vigo está a traballar -coa oposición da Xunta – para solucionar o problema do abastecemento de auga que padece a cidade a súa área de influencia. Destacou a negativa do goberno autonómico a asumir o proxecto de transvase desde o Verdugo tal e como determina o estudo de alternativas do Goberno de España para garantir o abastecemento para os próximos 50 anos.
Seguindo con iniciativas dentro do medio ambiente, aludiu ás hortas urbanas, aos sendeiros, aos humedais -os que xa están en marcha e os que se están recuperando. Prestou especial atención á recuperación da Xunqueira do Lagares, lembrando que no ano 2007 había unha depuradora, mentres que agora hai unha marabillosa zona medioambiental. Nesta mesma dirección se está a traballar nestes momentos en Goberna, o Vao, Fontes ou Pertegueiras. A ampliación da superficie dunar en Samil e o Vao; as praias caninas; 15 bandeiras azuis; o cinto verde que se “vai poñer en marcha de forma inmediata” e a reforma total de Vigozoo no que xa non haberá animais salvaxes en catividade, senón que será un centro de estudo da natureza.
A nova depuradora, o “maior avance medioambiental da historia” financiouse con fondos europeos e municipais, sen apoio algún da Xunta que, sen embargo, se fai negocio con esta instalación a través do canon da auga, destacou Caballero.
Na presentación deste xoves houbo unha especial mención á xuventude, con máis de 700.000 participantes en actividades formativas, lúdicas e deportivas desde 2008. Campamentos urbanos, cursos ou obradoiros ou rutas de divulgación científica pola Ría son algunhas das propostas destacadas. Non faltou O Marisquiño, consolidado como o maior festival de cultura urbana do mundo e ao que a Xunta non acaba de apoiar como merece. En todo caso, o alcalde garantiu a organización do evento ofrecendo o incremento da axuda municipal no caso de que o goberno autonómico non cumpra cos seus compromisos.
Balance da Marea de Vigo
Tamén fixo repaso dos tres últimos anos o grupo municipal da Marea de Vigo. A formación valora este tempo como un “retroceso na participación democrática e na construción dun Vigo socialmente integrador”. O partido entende que foron “uns anos complicados no ámbito municipal a raíz da paralización da actividade económica nos que os municipios tiveron que responder dunha maneira inmediata ás necesidades da veciñanza” pola Covid-19, en palabras de Rubén Pérez, voceiro do grupo municipal.
Ante a realidade vivida nos pasados tres anos, Marea de Vigo fai unha valoración negativa sobre as prioridades que o Goberno de Abel Caballero “decidiu asumir ante unha situación tan complexa”. En lugar de facer políticas activas de emprego ou de vivenda, con independencia de cal sexa a administración con máis competencias ao respecto, “o Goberno local dedicouse outra vez ás políticas inaugurables e de ornato, que unicamente buscan un impacto mediático e de oportunismo electoral mentres na nosa cidade hai centos de familias con importantes problemas de acceso á vivenda”, matiza o voceiro.
A isto súmase “a situación de precariedade laboral en certos sectores como o dos servizos, algo que un concello debe ter como prioridades antes de políticas efectivistas anunciadas a bombo e prato nos medios de comunicación”, engade.
Nestes pasados anos sucedéronse importantes modificacións lexislativas, sobre todo no relativo á utilización dos recursos económicos e o debate xerado sobre a necesidade de recursos dos concellos como o de Vigo para poder empregar eses recursos extra en políticas expansivas. Ante isto, “Marea de Vigo sempre sostivo que a maior parte deses recursos tiñan que dedicarse a construír ese escudo social, unha cobertura que lle dera garantías á veciñanza para que ante a subida dos prezos e os problemas de acceso á vivenda a administración dera unha resposta”, subliña Rubén Pérez.
Para Marea de Vigo, é prioritario seguir construíndo un espazo de unidade baixo a premisa de desenvolver un modelo de cidade para as persoas en contraposición ao modelo do Goberno actual, que dá prioridade ás concesionarias e aos intereses privados. “A nosa loita será sempre para a construción dunha cidade para toda a veciñanza e para os intereses da maioría”, conclúe Pérez.
