A Xunta de Galicia e Renfe Viajeros volven poñer en marcha a campaña das Letras Galegas co obxectivo de achegarlle as cantareiras ás persoas usuarias da rede ferroviaria. O secretario xeral da Lingua, Valentín García, e a delegada territorial da Xunta en Vigo, Ana Ortiz, presentaron a campaña na cidade olívica onde salientaron “a relevancia das homenaxeadas e a súa importante aportación ao noso patrimonio inmaterial”.
No acto, o representante da Consellería de Cultura, Lingua e Xuventude puxo en valor o compromiso do seu departamento coa promoción da lingua e a cultura propias. Neste senso, resaltou o traballo conxunto entre a administración e as empresas galegas para levar a cabo iniciativas que impulsen o uso do galego e así estender a celebración das letras ás persoas usuarias dos servizos ferroviarios.
Referiuse así ao selo anunciado hai uns días e cuxa creación xa está en marcha para recoñecer o compromiso das empresas e institucións co emprego do idioma, e que poderá terse en conta en convocatorias e procedementos públicos ou poderá servir como criterio de desempate.
Carteis gañadores do Concurso Letras Galegas 2025
Por outra banda, Valentín García agradeceu a colaboración de Renfe e sinalou que a campaña difundirase durante todo o mes de maio a través dos 11 trens de alta velocidade dos servizos Avant e Media Distancia dos corredores entre A Coruña, Santiago de Compostela e Vigo, e A Coruña, Santiago de Compostela e Ourense.
Sumado a esta imaxe das cantareiras, os espazos informativos das estacións das cidades galegas teñen expostos ao longo de todo o mes de maio os carteis gañadores do Concurso Letras Galegas 2025 da Xunta, que foron elaborados polo instituto Castelao de Vigo e o colexio Celso Emilio Ferreiro de Cerceda.
Ao abeiro desta presentación, Valentín García agradeceu a asistencia do xerente da Área de Servizo Público de Renfe Galicia, Ángel Moisés Durán, e tamén o toque musical posto polo cantante, músico, bailador e experto na tradición oral, Xisco Feijóo, e as cantareiras da agrupación viguesa O Fiadeiro.
