O Consello da Xerencia de Urbanismo tomou coñecemento na sesión deste martes de dúas resolucións que avogan pola restablecemento da tramitación da ampliación do recinto feiral de Vigo e da modificación do PXOM para o Barrio do Cura.
“O Concello está operativo en termos de traballo, seguimos dando licenzas e autorizacións e queremos que se reanuden algunhas cuestións”, declarou o alcalde en referencia a estes dous proxectos que estaban en marcha na cidade no momento de declararse o estado de alarma.
Sobre a ampliación do Ifevi, Abel Caballero advertiu que “queremos que se estableza a declaración de urxencia para a expropiación dos terreos e queremos que se continúe coa tramitación de todo o proxecto, non queremos que teña ningún retraso”. Así, a Xerencia de Urbanismo declarou a urxencia da expropiación e o carácter prevalente de utilidade pública do mesmo.
En relación ao Barrio do Cura, o rexedor afirmou que “non queremos que se ralentice, queremos que continúe, dando un marco de seguridade xurídica para que se execute o antes posible o barrio, unha obra importantísima na cidade e máis no momento actual no que urxe reactivar a edificación”. O Consello da Xerencia resolveu continuar co procedemento de modificación puntual do Plan Xeral de Ordenación Urbana para reordenar o Barrio do Cura declarando que non opere a suspensión de prazos que contempla o estado de alarma neste proxecto de interese público con incidencia directa na vida da cidadanía.
