A Asociación Veciñal de Teis criticou este mércores que a xuntanza mantida este martes entre o alcalde de Vigo, Abel Caballero, e o secretario xeral de Infraestruturas do Ministerio de Transportes, Mobilidade e Axenda Urbana, Sergio Vázquez, non abordara “ningún compromiso” do Goberno de España en relación ás reivindicacións sobre a autoestrada AP9.
A asociación botou de menos que a reunión tratara a conversión en tramo urbano da autoestrada desde Torres de Padín ao centro da cidade, a colocación de pantallas acústicas ou a mellora dos pasos elevados na Xorxa e na Trapa.
Desde a veciñanza consideran un “escándalo” que non se conseguira ningún avance en temas “tan importantes” para Teis e para a cidade. “O Ministerio de Transportes foi incapaz de esixir á concesionaria a mellora dos pasos elevados sobre a autoestrada AP9 en Teis ou no seu defecto que asuma a mellora dos mesmos o propio Ministerio, a través dos orzamentos do Estado”, expoñen.
“Debemos ter en conta, que si se cumpre o anuncio da eliminación da peaxe do tramo Redondela-Vigo, ten que abordase con urxencia a conversión en tramo urbano e polo tanto a mellora dos acesos a autoestrada. Agora Abel Caballero cala sobre a AP9, mentres gobernan no Estado os seus. Noutros momentos eran constante as comparecencias e declaracións reivindicando a mellora de accesos”, engaden.
