Perante a inminente finalización do estado de alarma en Galicia e o paso á denominada «nova normalidade» que permitirá a reapertura de parques infantís, áreas biosaúdabeis e instalacións deportivas ao aire libre (como pistas de skate), o Bloque Nacionalista Galego vén de demandar ao goberno municipal de Vigo que se reforce a limpeza e desinfección destes espazos fronte á Covid-19.
O concelleiro do BNG en Vigo, Xabier P. Igrexas, reclama que o Concello actúe con dilixencia para permitir o uso seguro desas instalacións, nomeadamente no caso do parques infantís. Neste sentido, o edil nacionalista propón tamén que se poña en marcha unha campaña informativa que indique de maneira clara as condicións de utilización para evitar ou reducir o risco de contaxios.Desde o Bloque advirten que após máis de tres meses fechados e cunha importante demanda por parte das familias, é probábel que se poidan producir afluencias significativas nestes espazos nos primeiros días trala súa reapertura polo que entenden necesario «explicar socialmente de que maneira se van poder utilizar».
En calquera caso o Concello de Vigo aínda non confirmou que abrirá os parques infantís este luns, tal e como permite a Xunta de Galicia, e o propio Abel Caballero indicou que antes de tomar a decisión quería coñecer de primeira man a norma publicada polo Goberno autonómico.
