Segundo denuncian nun comunicado, o incremento dun médico de familia e dun efectivo de persoal administrativo “é claramente insuficiente para a atención de mañá e tarde”, un feito que se cadra agrávase máis neste caso ao ser Navia unha das zonas de España con máis cativos menores de tres anos.
CC OO vén esixindo que este centro de saúde “sexa dotado do persoal suficiente para atender a toda a poboación do barrio e do seu entorno” e dende o sindicato pregúntanse que ocorrerá cos nenos que acudan de tarde ao estar o centro aberto, ca que “alguén terá que velos e decidir onde dirixilos”, o que consideran “unha carga mais” para os profesionais existentes que non son especialistas en Pediatría.
Por iso, reiteraron a súa demanda de dar ao ambulatorio o número de traballadores necesarios, que ao seu xuízo “debería incrementarse en catro médicos de familia, dous pediatras, seis enfermeiros, dous membros de Persoal de Servizos Xerais (P.S.X.), así como proceder ao “incremento nas demais categorías de alomenos un efectivo para atender en
condicións en quenda de mañá e tarde”.
Por último, dende CC OO lembran que na inauguración do centro o 7 de maio do 2012 “dicían dende a consellería de sanidade que o centro estaba deseñado para 45.000 pacientes e tería 28 médicos de familia e 6 pediatras”. “Parece evidente que naquel intre a Xunta e o Sergas venderon fume electoral”, engaden.
