A día de hoxe un total de 48 (sete en UCI) dos 67 hospitalizados en Vigo con coronavirus están ingresados no Hospital Álvaro Cunqueiro de Vigo (13 en Povisa e 6 en Fátima). O centro médico situado en Beade é o punto neurálxico da loita contra o Covid-19 na comarca de Vigo.
Segundo explicou este martes o Sergas, no Cunqueiro hai dúas Unidades destinadas ao ingreso e atención exclusiva dos pacientes con diagnóstico confirmado de Covid-19. Son as emprazadas na planta terceira, nas Velas C e D.
Ademais, destinouse a Vela C da segunda planta á atención aos pacientes con sospeita de padecer a enfermidade pero aínda non está confirmada.
A medida que vaian aumentando as necesidades de hospitalización, vanse desenvolvendo novas fases do Plan de Continxencia e novas medidas asistenciais e organizativas. Desta forma, xa hai unha nova Vela lista para acoller unidades de coidados intensivos se así fixera falla.
Equipos COVID-19
No referido aos profesionais, os pacientes están sendo atendidos polos equipos específicos constituídos a tal fin, os catro Equipos Covid:
Un equipo Covid de Urxencias, formado por un facultativo, un profesional de enfermaría e un TCAE, que se encargan de atender aos pacientes con criterio clínico e epidemiolóxico sospeitosos nos circuítos dese servizo.
O segundo equipo é de hospitalización, liderado por un internista especializado en infecciosas ou un neumólogo, que se encargan de realizar o ingreso destes pacientes, atendelos nos seus cuartos e facer o seu seguimento.
O equipo de seguimento compartido de atención especialidade (Escah), é un equipo de Hospitalización a Domicilio. Composto por un facultativo e unha enfermeira, responsabilízase do seguimento clínico dos casos positivos en illamento domiciliario, e de coordinar, se fose necesario, os ingresos no hospital.
En canto á realización de Test PCR, continúan operativos sete equipos de extracción de mostras domiciliarias ademais do dispositivo fixo no Hospital do Meixoeiro, o Covid-Auto. A dia de hoxe, a área de Vigo leva realizadas 1.860 destas probas diagnósticas.
