O alcalde de Vigo, Abel Caballero, deu conta este venres dos temas que abordará a presentación da cidade na Feira Internacional de Turismo que se terá lugar en Madrid o vindeiro xoves, día 20 de xaneiro, no espazo de Turespaña. “A presentación xirará ao redor de dous eixos: o Nadal de Vigo e as Illas Cíes, Patrimonio da Humanidade; dous grandes temas avalados pola prensa de todo o mundo”, expuxo Caballero. Engadiu que as Illas Cíes acaparan o interese dos principais periódicos do mundo e que, no caso do Nadal da cidade, é un tema do que “falan tódolos xornais do mundo”.
O rexedor explicou que a cidade conta nestes momentos cun ámbito turístico que é o Nadal, que dura case 60 días con afluencia masiva, o que se configura como “un gran proxecto e realidade turística” da mesma maneira que a candidatura “Illas Cíes, Patrimonio da Humanidade”, vén de ser avalada por New York Times, mentres “foi bloqueada por Feijóo, que non fixo nada”.
Así, a presentación en Fitur baixo o lema “Vigo, o mundo na cidade”, será o vindeiro xoves 20 de xaneiro, ás 4 da tarde, na caseta de Turespaña, “na sede máis importante da feira” e contará coa presenza da ministra de Turismo, Reyes Maroto, “queremos que a proposta viguesa teña importancia”, recalcou o alcalde.
En rolda de prensa, o alcalde puxo en valor o turismo en Vigo, que “é colosal”, cun tipo de turista “que gasta na cidade e apreciamos que o turismo de Cíes é importantísimo, con capacidade adquisitiva e con aprecio ao medio ambiente”.
