En primeiro lugar, queremos aclarar que, a nosa adscrición foi feita sen seguir os cauces legais, que foi unha decisión persoal dun cargo da Xunta de Galicia en Vigo. É importante aclarar este punto porque é un exemplo do funcionamento das institucións que traballan para protexer ós cidadáns e cidadás desta comunidade autónoma.
En segundo lugar, dende o ano 2016, xunto con todas as forzas vivas de Vigo, levamos reclamando un adscrición xusta, que non marxine ós nosos fillos e fillas. E, queren saber cal foi a resposta de Xunta de Galicia? NINGUNHA.
Só se comunican connosco ninguneándonos a través da prensa. A única noticia que recibimos deles é a través de declaracións que fan nos xornais. Isto é unha mostra do maltrato que recibimos das institucións que están velando polos nosos dereitos e os dos nosos fillos. De verdade, para isto imos votar cada catro anos? Para que despois os responsables de dirixir esta comunidade gobernen en base a decisións persoais que marxinan a familias dun dos barrios máis importantes dunha cidade como Vigo? Isto suporía unha falta de respecto a ciudadanía enorme.
En terceiro lugar, temos que rebatir un dos argumentos que máis empregan a través da prensa. Constantemente repiten que a porcentaxe de alumnos e alumnas que van ó Valadares é ampla. E nós preguntámonos, que nos están chamando a desobedecer?. Iso é o que queren? Se desobedecemos e un ano, a maioría das familias de sexto rexeitan a nova adscrición, de verdade, escoitaríannos? Cambiarían a adscrición?
Cremos que é un argumento sen base, que o único que pretenden é crear un conflito entre todas as familias que formamos esta fermosa comunidade educativa. Están facendo moito dano con esa actitude manipuladora a través da prensa ademais de ridiculizar a pais e nais que só desexan unha educación de calidade nunha das cidades máis importantes de Galicia.
Por último, gustaríanos engadir que non temos medios, somos unha comunidade pequena, con traballos e miles de problemas. Calquera concentración, manifestación supón un sacrificio para todos nós. Por este motivo confiamos tanto nos medios de comunicación porque sodes o que nos dades voz cando as institucións que teñen que defender os nosos dereitos nos abandonan, como sucede nesta ocasión. Porque así é como nos sentimos nesta pequena e valente comunidade: ABANDONADOS.
Por todo isto, esperamos a vosa comprensión, solidariedade e apoio. Isto non é cuestión dun autobús, isto é a defensa da educación pública, dunha zonificación legal e xusta para os nosos fillos e fillas.
Un saúdo. Moitísimas grazas.
Firmado: ANPA Alfonso Rodriguez Castelao (Pedra Seixa, 35)
