Tras dous días de proxeccións no Museo de Arte Contemporánea, o Festival Primavera do Cine continúa a súa andaina no auditorio municipal, na Praza do Rei, onde se poderá presenciar toda a programación de curtametraxes e longametraxes en sección oficial entre o xoves día 7 e o sábado 9.
Este xoves, ás 19.00 horas, proxéctase o último pase do bloque de curtametraxes titulado ‘Charneca em flor’, composto por varios filmes. Entre eles, ‘Pedro e Inácio’, dirixido por Caio Dornelas, un documental de corte político e combativo que aborda as loitas camponesas polo dereito á terra nunha pequena comunidade do Brasil.
Tamén se inclúe ‘A jornada’, dirixido por Mateus Rosa, un traballo de cinema experimental en súper 8 dun cineasta que podemos considerar, pola súa traxectoria, un referente internacional neste xénero.
Ademais, poderase ver ‘Ciranda feiticeira’, dirixido por Lula Gonzaga e Tiago Delácio, un traballo de cinema de animación. Lula Gonzaga é un dos grandes veteranos da animación brasileira. Foi o primeiro cineasta en realizar unha curtametraxe de animación na importante industria cinematográfica de Pernambuco: ‘Ver ouvindo’ en 1972.
Ás 20.30 horas comeza a sección oficial de longametraxes coa proxección de ‘Meu amigo Lorenzo’, dirixida por André Luiz Oliveira. O filme narra a relación de amizade que se establece entre o cineasta e un neno con autismo a través dun obradoiro de musicoterapia con sesións gravadas ao longo de quince anos.
André Luiz Oliveira é todo un icono do cinema marxinal brasileiro desde finais dos anos sesenta, etiqueta que acadou a partir da difusión do seu filme ‘Meteorango kid, o heroi intergaláctico’ (1969). A súa traxectoria está composta por numerosos filmes de prestixio como ‘A lenda de Ubirajara’ (1974) e ‘Louco por cinema’ (1994).
A organización do festival destaca que seguen abertas as inscricións para o obradoiro Proxecto Remolque e a conferencia sobre cine e perspectiva de xénero impartida por Adriana Páramo. As inscricións son de balde e poden tramitarse a través do enderezo electrónico primaveradocine@gmail.com.
