“Falamos –tal e como informou a presidenta da institución, Carmela Silva- dos castros de Santa Trega na Guarda, Troña en Ponteareas, O Facho en Cangas, A Lanzada en Sanxenxo, Adro Vello no Grove, Monte do Castro en Ribadumia, Porta de Arcos en Rodeiro, Castrolandín en Cuntis, A Cabeciña en Oia, A Subidá en Marín, Castro Alobre en Vilagarcía, Alto dos Cubos en Tui, Alto da Cruz do Castro en Cotobade, Coto de Altamira nas Neves, Mercado dos Mouros en Valga, Castro de Penalba en Campo Lameiro, Castro de Pena Redonda en Ponte Caldelas e Castro de Toiriz en Silleda”.
A través desta actuación, que inclúe dende escavacións (Santa Trega, Alobre, Facho, A Lanzada, Porta de Arcos e Mercado dos Mouros), labores de limpeza e mantemento (nos doce castros restantes), ata actividades de promoción, creación de ambientes museográficos e o rexistro dixital dos xacementos en 3D, a institución provincial, tal e como manifestou a súa Presidenta, “pretende impulsar o patrimonio e a dinamización socioeconómica, cultural e turística de Pontevedra”.
O primeiro dos castros nos que se iniciaron os traballos de escavación foi Santa Trega que, tal e como subliñou Silva, “cumprindo coa planificación establecida no protocolo, remataron no mes de marzo e, a día de hoxe, tres persoas están a realizar o estudo e inventario dos 40.000 materiais atopados na Guarda”. Neste eido, o arqueólogo da Deputación, Rafael Rodríguez, deu a coñecer, a falta do remate do informe avaliativo, que “as probas de Carbono 14 indican que o asentamento de Trega estivo ocupado dende antes do século IV A.C. e que foi a partir do I A.C. cando se constata a diferenciación entre un mundo privado e público no asentamento, con edificacións de carácter social ou relacionadas co mundo das crenzas”.
Castro Alobre
Pola súa banda, está a piques de rematar a escavación en Castro Alobre á que a institución provincial, tras a súa aprobación hoxe en Xunta de Goberno, destinará 151.887,76 € para a posta en valor do xacemento. Sobre este asentamento, Carmela Silva deu a coñecer que, acompañada do alcalde de Vilagarcía de Arousa, realizará o vindeiro xoves unha visita para coñecer e ver in situ a evolución da escavación e os achados atopados durante a mesma.
En Adro Vello, O Grove, realizouse xa a limpeza para levar a cabo o estudo de estabilidade e xeometría de alta definición, escaneado en 3D, que permitirán establecer os criterios de restauración e conservación.
No caso de Valga, no Mercado dos Mouros, técnicos da Deputación de Pontevedra comezaron o luns 16 de maio os traballos de sondaxe, que se estenderán durante un mes. En total, realizaranse en Valga 14 sondaxes para definir a data e extensión da ocupación no xacemento e confirmar a hipótese de que se trataba dunha instalación portuaria.
Amais, a Presidenta da Deputación avanzou que nunhas semanas, en xuño, comezarán as escavacións na Lanzada (Sanxenxo) e a mediados de setembro está previsto que comecen no Facho de Donón (Cangas).
Cronograma de traballos
Pola súa banda, Carmela Silva tamén comunicou que “estes días técnicos do Ministerio de Fomento e a empresa adxudicataria da musealización dos xacementos estiveron na nosa provincia visitando os recintos e planificando con técnicos da Deputación a súa actuación”. Está previsto que a partir desta visita e reunión se realice xa un cronograma de traballos nos xacementos que restan, consolidando e realizando tarefas de limpeza e musealización nos recintos de Monto do Castro (Ribadumia), Adro Vello (O Grove), Mercado dos Mouros (Valga), Castro de Troña (Ponteareas), A Cabeciña (Oia), Porta de Arcos (Rodeiro), Castrolandín (Cuntis), A Subidá (Marín), Alto dos Cubos (Tui), Alto da Cruz do Castro (Cotobade), Coto de Altamira (As Neves), Castro de Penalba (Campo Lameiro), Castro de Pena Redonda (Ponte Caldelas) e Castro de Toiriz (Silleda.
