A veciñanza de Oia deu, esta fin de semana, unha cálida e afectuosa homenaxe a don Antonio Estévez, quen acaba de retirarse como párroco de Burgueira e Loureza despois de 60 anos exercendo estas funcións.
Un total de 260 persoas asistiron a unha comida-homenaxe celebrada o domingo no recinto da Casa da Sociedade de Burgueira e que serviu de despedida a don Antonio, quen se retira aos 86 anos de idade. En 1964, don Antonio chegaba a Loureza recén nomeado párroco e posteriormente trasladaba o seu domicilio a Burgueira, onde reside actualmente. A longo das 6 décadas nas que desenvolveu labor pastoral nas dúas parroquias, o sacerdote destacou pola súa dedicación, humanidade e pola axuda desinteresada que sempre prestou a quen máis o necesitaba.
No transcurso do acto, don Antonio dedicou fermosas palabras a todos os veciños e veciñas cos que ten compartido o seu día a día ao longo dos anos. “Non sabedes o feliz que son. A miña vida foi sempre un rosario, en xeral, de boas cousas. Pero sobre todo tres: a miña familia, as miñas parroquias e os meus amigos”, manifestaba durante a súa intervención, que concluía cun emocionado “dígovos que vos quero a morte”.
Pola súa banda, a alcaldesa de Oia, Cristina Correa, trasladou unha mensaxe de agradecemento e admiración a “un home excepcional, cuxa humildade e xenerosidade estiveron presentes na nosa comunidade durante os últimos 60 anos” e que foi “amigo, guía e pilar fundamental das comunidades de Loureza e Burgueira”. Nesta nova etapa que se abre agora, Correa desexoulle paz, alegría e moita saúde, “coa certeza de que sempre seá parte de todos nós”.
A celebración, que incluiu un xantar popular, estivo amenizada polo cantante Antonio Barrios e contou con momentos de especial emotividade. Entre eles a dedicatoria do tema musical de Nino Bravo “Un beso y una flor”, que as persoas asistentes lle quixeron cantar a propio homenaxeado por ser a súa canción favorita. Así mesmo, don Antonio recibiu unha placa conmemorativa, que foi entegada polo Concello de Oia e as comunidades de montes de Burgueira e Loureza. Como mostra de agradecemento e signo de admiración, o homenaxeado tamén foi agasallado cun cáliz.
