O Concello de Arbo vai realizar varias actuacións para mellorar a accesibilidade e a seguridade dos visitantes nos sendeiros que percorren o espazo Rede Natura do Baixo Miño.
Trátase dos sendeiros que percorren a beira do Rio Miño e do Rio Deva, ao seu paso pola localidade, para o que se solicitou unha subvención da Rede Natura. Unha vez concedida, o Concello acaba de adxudicar os traballos, que se desenvolverán por un prazo de tres meses, e que consistirán na construción de varandas no Sendeiro do Deva para evitar caídas a distinto nivel, a creación dun acceso ao Sendeiro de Pescadores do río Miño no entorno do campo de fútbol e a modificación do trazado no Sendeiro da Moura ocasionado por un derrube.
O importe da actuación nos sendeiros ascende á cantidade de 25.852,19 euros (IVE do 21% incluído que ascende a 4.486,74 €), dos que 21,365,45 contan co financiamento da Dirección Xeral de Patrimonio Natural da Consellería de Medio Ambiente, Territorio e Vivenda da Xunta de Galicia.
«Con esta actuación preténdese mellorar o sendeiro de Pescadores que percorre a beira do Río Miño ao seu paso por Arbo, así como mellorar a seguridade dos usuarios do sendeiro mediante a creación de diferentes infraestruturas que faciliten o tránsito», indicou o alcalde de Arbo, Horacio Gil.
Tres rutas de sendeirismo
O Concello de Arbo conta con tres rutas de sendeirismo que percorren o seu espazo Rede Natura e que están conectadas entre elas: son o sendeiro de Pescadores do Miño, o sendeiro de Pescadores do Deva e o sendeiro da Moura.
Sendeiro de pescadores do río Miño: Percorre a ribeira do Miño ao longo de 7 km dende a praia de Sela ata os miradoiros da ponte internacional.
Sendeiro de pescadores do Deva: Dende os miradoiros da ponte internacional percorre a desembocadura do río Deva no Miño e continúa augas arriba pola marxe esquerda do Deva ata chegar a praia fluvial de San Xoán.
Sendeiro da Moura: Tratase dun sendeiro circular que pasa pola praia fluvial de San Xoán e percorre a marxe esquerda do Deva e os montes de Arbo ascendendo ata o Coto da Moura.
No espazo Rede Natura tamén se inclúe parte dos cursos de varios ríos, entre os que se encontra o Deva que desemboca no Miño ao seu paso por Arbo. Este espazo protexido inclúe unha serie de ecosistemas de elevado valor ecolóxico e ben diferenciados entre si. Ao longo de todo este tramo do leito fluvial do Miño atópanse manchas descontinuas de bosques de ribeira que xogan un importante papel natural.
O río Miño é un espazo con indubidables valores naturais como demostra que fose declarado LIC (pasando a formar parte da Rede Natura 2000), Zona de Especial Protección dos Valores Naturais (figura lexislativa galega) e área ZEPA (Zona de Especial Protección de Aves) segundo a Unión Europea. A presenza de fauna propia do río ten elevada importancia ecolóxica. Entre as especies que atopamos destaca a lamprea, tanto polo seu valor etnográfico como económico. No lugar tamén se atopan poboacións de anguía, salmón e troita.
Os leitos fluviais que discorren polo municipio de Arbo tamén permiten que o visitante poida gozar en todo momento de magníficas paisaxes. Sendeiro da Moura, Roteiro dos Pescadores, Roteiro das Pesqueiras, o Paseo fluvial Rio Miño –Deva ou o Roteiro da Lamprea, que mostran os encantos dos ríos e paisaxes. «Con estas melloras de acondicionamento queremos poñer en valor todo este patrimonio da Vila de Arbo», sinalou Horacio Gil.
