A Concellería de Mobilidade e Tráfico de Ponteareas concluíu a instalación da sinalización vertical que limita a velocidade no centro urbano a 20 quilómetros por hora dando ademais prioridade na calzada aos peóns. A sinalización instalouse en todas as rúas que dan acceso ao centro urbano: Fermín Bouza Brey, Sarmiento Rivera, Xoán Trobador García de Guillade, Paseo Matutino, Castañal, Avenida de Galicia, Rúa da Braña e Rúa Amieiros. A única avenida que non conta con esta regulación é a de Castelao, de titularidade autonómica. O Concello solicitou á Xunta que se reduza o límite de velocidade de 50 a 30 quilómetros por hora, sen obter ata o de agora resposta.
A actuación finalizada esta semana complementa outras adoptadas nos últimos quince días: por unha banda aprobouse o bando que establece esta nova regulación nas vías municipais da vila e por outra editouse e distribuíse por todo o casco urbano un cartel informativo.
A sinalización supón que os vehículos a motor deben conceder prioridade aos peóns e estes poden utilizar a zona de circulación aínda que non deben estorbar innecesariamente ao vehículos.
A Concellería de Mobilidade e Tráfico fixo un chamamento a “respectar a nova regulación e circular a 20 quilómetros por hora” porque deste xeito “gañaremos en seguridade e calidade de vida, con menos contaminación acústica e atmosférica”.
