O Concello de Ponteareas anunciou a incoación dun expediente sancionador por parte da Xunta de Galicia en relación co funcionamento de dúas aulas da escola infantil municipal. A decisión da administración autonómica afecta a 29 prazas dun centro que conta con 111 e ten unha elevada demanda de matrícula.
Entre 2015 e 2018, coincidindo co cambio de goberno, a Xunta realizou dúas inspeccións e o pasado mes de decembro abriu un expediente sancionador polas obras de ampliación para dúas aulas realizadas polo goberno do alcalde González Solla (Partido Popular) en 2006 e 2007. Esas obras, cun custo de 319.000 euros, executáronse “infrinxindo as normas vixentes” para este tipo de centros e as aulas abríronse “sen autorización” da Xunta, segundo expón o Concello. Agora a administración autonómica abre o expediente, cualifica a infracción como grave e propón unha sanción de 3.001 euros.
Para a concelleira de Benestar Social, a nacionalista Verónica Carrera, o acontecido é “moi grave”. “Como consecuencia da nefasta xestión daquel goberno, malgastáronse 319.000 euros nunhas obras de ampliación que non cumprían coa normativa vixente naquel momento e que agora non se poderán utilizar por esa incompetencia”. Por outra banda, a concelleira considera “curioso e estraño que a Xunta realizara as inspeccións desa obra e aulas a partires de 2015, cando se produciu o cambio de goberno local”.
Verónica Carrera sinalou que o “Goberno municipal investigará o acontecido e quen é o responsábel directo de que en 2006, con González Solla como alcalde, se fixeran unhas obras na Escola Infantil infrinxindo a normativa e sen autorización. É necesario depurar responsabilidades por investir 320.000 euros nunhas obras que agora non se poden empregar”, engadiu a concelleira de Benestar Social.
Para poder axustar as obras á legalidade e lograr a autorización da Xunta para o uso das aulas, os informes emitidos polos servizos técnicos municipais sinalan que se deberían investir 350.000 euros e realizar unhas obras que obrigarían a pechar toda a Escola durante un curso. A concelleira de Benestar explicou que “polo momento se optará por manter o funcionamento do resto da escola e estudar outras alternativas de futuro para atender a demanda existente”.
Carrera lamentou ademais a falta de apoio da Xunta ao centro: “Dos 577.000 euros que nos custa este servizo, o Concello asume case o 90%, as familias o 6,5% e a Xunta tan só o 5,9%, é dicir, menos incluso cas familias. Ademais de contribuír con porcentaxes ridículas, agora deciden pechar parte da escola”.
