A Deputación de Pontevedra continúa as saídas programadas ao abeiro de +Convivencia, con 20 novas actividades das que desfrutarán 1.909 persoas da provincia a través de entidades do Porriño, Catoira, Dozón, Redondela, Vila de Cruces, Marín, Baiona, Cangas do Morrazo, Caldas de Reis, Vigo, Pontevedra, Silleda e Sanxenxo. A actividade máis demandada terá lugar o domingo 22 de xuño cunha visita ás illas Cíes, á que asistirán desde Baiona 260 persoas da ANPA Covaterreña.
O sábado 21 de xuño tamén visitarán as Illas Cíes desde Vigo 59 persoas da ANPA IES Valadares e 58 da APA CEIP Paraixal. Ademais, desde este mesmo concello serán 110 participantes da APA Colexio Mariano os que viaxarán ao Acuario do Grove nun barco con visión submarina e 41 mulleres da Rede de Mulleres Veciñais Contra Os Malos Tratos as que coñecerán as Illas Ons (Bueu) e Sálvora (Ría de Arousa). Este mesmo día realizaranse catro saídas máis á illa de Ons con 150 persoas da ANPA CEIP Ribeira de Torneiros, 120 da ANPA CEIP Sequelo, 55 da Asociación cultural e veciñal Axouxere de Fiestras e 55 máis da Asociación Pío Cabanillas Gallas, procedentes do Porriño, Marín, Silleda e Dozón, respectivamente. A xornada complétase cunha visita guiada á Illa de San Simón por parte de 45 veciños de Catoira, procedentes da Asociación San Antonio de Dimo.
As actividades continúan o domingo 22 con dúas visitas máis ás Illas Cíes nas que participarán 148 persoas do Centro Social de Vilar de Infesta (Redondela) e outras 135 da ANPA CPR Eduardo Pondal (Cangas do Morrazo). Tamén haberá dúas visitas ás Illas de Ons na xornada do domingo con 176 participantes da APA Colexio Amor de Dios (Vigo) e 155 máis da ANPA CEIP Cabanas (Pontevedra). Por outra banda, desde Vila de Cruces 63 persoas da Asociación Social e Cultural Garatuzas de Piloño visitarán a aldea dos Grobits na Illa da Toxa (O Grove), 59 mulleres da Asociación Rosalía de Castro (Vigo) pasearán en barco histórico polo Río Miño, outras 55 da Asociación Santa Lucía de Arcos (Caldas de Reis) coñecerán Ponteareas e 55 participantes da ANPA Magaláns-Dorrón (Sanxenxo) realizarán unha ruta en catamarán pola Ría de Arousa.
A intensa programación de actividades da semana remata con dúas saídas desde Vigo. Serán o martes 24 cunha visita ás Illas Cíes por parte de 55 participantes de AFAGA e cunha visita cultural á Illa de San Simón e ás Salinas de Ulló na que participarán 55 persoas da Asociación Párkinson Vigo.
O programa +Convivencia, cun orzamento de 275.000 euros (un 25% máis que os 220.000 euros da súa primeira edición), está a permitir que 229 entidades sen fins de lucro coñezan o patrimonio natural, artístico, etnográfico e cultural da provincia de Pontevedra. A Deputación oferta un amplo catálogo de actividades relacionadas coa arqueoloxía, coa arquitectura civil, relixiosa ou popular, co Camiño de Santiago ou cos museos, entre moitas outras. Todas as propostas están abertas a entidades de iniciativa social, asociacións de mulleres, de maiores, veciñais e culturais ou tamén ANPA da provincia.
O goberno provincial destina este ano a cada entidade unha axuda de ata 1.200 euros (o ano pasado as axudas máximas eran de mil euros) para que poidan xestionar e deseñar con total autonomía a súa actividade, favorecendo a contratación de empresas do tecido máis próximo e estimulando a economía local. Ademais, o número mínimo de persoas participantes en cada excursión é de 30, ou 20 no caso daquelas viaxes ou actividades nas que sexa necesario contratar autobuses e participen persoas con mobilidade reducida que precisen unha cadeira de rodas ou outras axudas técnicas.
