A Deputación de Pontevedra abre este luns 25 de agosto o prazo para inscribirse nos percorridos de setembro do programa provincial “+Bosques”, unha iniciativa que promove o contacto directo coa natureza e permitirá ás persoas participantes, 15 por quenda, gozar das vantaxes dos “baños de bosques”. Esta iniciativa permitirá gozar de rutas desde o domingo 6 de setembro na Illa de Tambo ata o domingo 28 no Carreirón. As persoas interesadas en participar nestas actividades poderán inscribirse a partir das 9:00 horas deste luns 25 de agosto a través dun formulario que se habilitará no sitio web da Deputación.
Os percorridos de setembro comezarán o sábado 6 na Illa de Tambo (Poio), unha actividade que se repetirá tamén o sábado 20. O domingo 7 de setembro chegarán á Ruta do río Xabriña (Covelo), o sábado 13 e domingo 28 de setembro ao Carreirón (A Illa de Arousa), o domingo 14 e sábado 27 de setembro ao Pazo de Lourizán (Pontevedra) e por último o domingo 21 de setembro á Ruta da Pedra e da Auga (Meis). As actividades de +Bosques esténdense ata finais do mes de outubro con novas quendas na Illa de Tambo, no Carreirón, na Ruta da Pedra e da Auga e no Pazo de Lourizán, así como en Cabo Udra (Bueu) e no Río Eifonso (Vigo).
“+Bosques” duplicou este ano a oferta de percorridos en sete espazos da costa e o interior da provincia onde poder coñecer a variedade de ecosistemas ricos en biodiversidade de Pontevedra. Todas as rutas, algunhas delas pola tarde, pretenden proporcionar ás persoas participantes unha experiencia chea de estímulos para comprender o método de aplicación do “baño de bosque” e a conexión directa en e coa natureza. Deste xeito, promóvese a estimulación sensorial a través do olfacto, o tacto, a vista, o oído e o gusto, así como a realización de exercicios físicos e psicolóxicos para comprender, entender e fortalecer os lazos co medio natural da provincia.
