O Instituto de Investigación Sanitaria Galicia Sur (IISGS), situado no Hospital Álvaro Cunqueiro, situarase na “vangarda tecnolóxica” coa adquisición do novo microscopio confocal de súper resolución. O aparello suporá, segundo asegura a xerencia da área sanitaria de Vigo, un “importante salto cualitativo” nos traballos de investigación do instituto e será “referencia” a escala nacional.
A adquisición deste equipo de última xeración é posible grazas a un financiamento europeo de 431.704 euros comprometido a través de Fondos Feder. Esta cifra supón aproximadamente o 80% do custo total do proxecto. O investimento total no aparello, sen incluír o IVE, é de 539.631 euros.
A licitación de concurso publicouse xa no Boletín Oficial das Comunidades Europeas para que as empresas interesadas no proxecto poidan realizar as súas ofertas antes do próximo 15 de xullo.
De acordo coas previsións, o novo microscopio confocal de súper resolución estará listo para traballar a finais deste ano e será instalado en dependencias do propio Instituto de Investigación Sanitaria. A tal fin, xa está reservada unha sala da área que ocupa o Instituto no Hospital Álvaro Cunqueiro.
O microscopio confocal de súper resolución permitirá observar as células en vivo cun altísimo grao de exactitude, así como os mecanismos moleculares. O equipo estará dotado dun módulo que permite o escaneo rápido das mostras en vivo (desde 28 imaxes por segundo) polo que poderase realizar experimentos que son imposibles de levar a cabo nestes momentos cos microscopios confocales estándares.
Interese nacional e internacional
O investigador principal que figura no proxecto é Roberto Agís-Balboa, do Grupo de Neurociencia Traslacional do IISGS. “O novo microscopio situará ao instituto como un dos centros de referencia a escala nacional para facer estudos de microscopía confocal de súper resolución en vivo”, subliña o investigador, que salienta, “este equipamento será o único dun nivel tan avanzado e preciso en Galicia e permitirá potenciar as colaboracións con outras institucións e con empresas biotecnolóxicas nacionais e extranxeiras”. De feito, o IISGS converterase en referencia para o noroeste peninsular neste tipo de investigacións.
A nova infraestrutura servirá, ademais de para impulsar a investigación biomédica en Galicia, para potenciar os proxectos transfronteirizos co Norte de Portugal.
Xunto con Agís-Balboa, serán responsables do novo equipamento os tamén investigadores Saida Ortolano, do grupo de Enfermidades Raras e Medicina Pediátrica; Susana Teijeira, directora do Biobanco do Instituto e responsable do grupo de Microscopía do IISGS; e Carlos Spuch, tamén de Neurociencia Traslacional.
O Instituto de Investigación Sanitaria Galicia Sur engloba a investigadores das áreas sanitarias de Vigo, Pontevedra e Ourense, así como a grupos de investigación da Universidade de Vigo, e está xestionado pola Fundación Biomédica Galicia Sur.
