A Xunta de Goberno aprobou este venres a licitación do proxecto da pavimentación da Avenida de Citroën, así como a adxudicación das obras para a cubrición lateral da pista do Centro Cultural de Becerreira, en Cabral, e a instalación dun novo céspede artificial no campo das Travesas.
O alcalde detallou este venres que o investimento para realizar na obra de pavimentación da Avenida de Citroën, aprobada na Xunta de Goberno de hoxe, ascende a 555.000 euros e contará cun prazo de execución de 3 meses. “Inmediatamente imos proceder a licitar a obra para a reposición do firme, para os novos sumidoiros , a rede de pluviais, reposición da sinalización, mellora das arquetas”, afirmou.
Novo céspede artificial nas Travesas
Entre os acordos adoptados hoxe tamén figura a adxudicación das obras para instalar o céspede artificial no campo de As Travesas. Contarán cun investimento de 363.000 euros, segundo avanzou o alcalde ao sinalar que o colocado en 2015 atópase “moi deteriorado” e que, ademais, renóvase o saneamento, o abastecemento e a rega. “Este campo terá un uso mixto para fútbol e para hockey”, sinalou.
Centro Cultural de Becerreira
Abel Caballero explicou que coa nova obra a executar no Centro Cultural de Becerreira, o Concello reforza a cubrición, xa que á executada hai uns meses súmase a lateral para facer fronte á entrada da auga como consecuencia dos fortes ventos que se rexistraron durante todo o inverno.
“Engadimos unha cubrición lateral con fachadas de láminas de aceiro que vai evitar que a auga e o aire impidan o uso do espazo deportivo”, apuntou o rexedor tras avanzar que as obras estarán rematadas “nun tempo moi rápido”. Recalcou que este centro de Cabral conta cunha actividade “extraordinaria”.
