Nun tempo como o actual, no que se debate sobre a presenza das diferentes linguas, acontecen sucesos que abren unha porta á esperanza. A curtametraxe ‘Para sempre, Malévich’, do director e guionista Antón Veiga, vén de gañar o primeiro premio na categoría de curtametraxes de ficción no We Cam Fest, o festival de cinema inclusivo de Colombia. A obra, rodada en galego, adapta parte dos relatos da ‘Galería de saldos’ (Xerais, 2016), do autor galego Diego Giráldez.
Outras 19 creacións competían na mesma categoría, principalmente, en español, neste festival que promove a inclusión das persoas con diversidade funcional, a través do cinema. E, de entre todas elas, a galega foi a considerada como mellor obra do 2020 polo xurado profesional do certame.
‘Para sempre, Malevich’ recolle o relato inicial do libro de Giráldez, no que unha galerista de arte, interpretada por Iria Sobrado, coñece a un marchante de arte cego, interpretado polo actor do grupo Valacar da Once, Felipe Cotelo. A presencia e a naturalidade da relación entre os dous actores, é un dos puntos fortes da obra, para alzarse con este galardón internacional.
A obra representa o debut na ficción de Antón Veiga, e tamén do director de fotografía da obra, Mateo Hernández. Unha obra rodada en febreiro de 2020, xusto antes do momento máis duro da pandemia, que freou moitas das posibilidades de dar a coñecer a obra. Rodada unicamente co apoio da produtora Elemental Chefs, alzarse cun premio internacional, supón un apoio a lingua galega e o traballo audiovisual feito dende Galicia.
Veiga e Hernández continúan a preparar os seus seguintes proxectos, entre os que destacan dúas series documentais: ‘De letras e Galegas’ que recolle unha serie de entrevistas a escritoras en galego; e ‘Obxectivo en Galicia’ que recolle os perfís de 5 profesionais da fotografía da nosa terra, amosando unha expresión artística non sempre posta en valor.
