O acto, que se celebrou no Salón García de Vilagarcía de Arousa, estivo presidido pola decana do Colexio de Arquitectos de Galicia, Elena Ampudia; o deputado de Infraestruturas e Vías Provinciais da Deputación de Pontevedra, Gregorio Luís Agís; o alcalde de Vilagarcía de Arousa, Alberto Varela; e o presidente da Delegación de Pontevedra do Colexio de Arquitectos, Anselmo Villanueva.
Ao evento asistiron tamén autoridades locais e autonómicas, como a directora xeral de Ordenación do Territorio e Urbanismo, Encarnación Rivas; o director do Museo de Arte Contemporánea de Vigo, Miguel Fernández Cid; o delegado en Pontevedra do Colexio Oficial de Aparelladores, Arquitectos Técnicos e Enxeñeiros da Edificación de Pontevedra, Manuel Raño; a concelleira de Urbanismo, Vivenda e Patrimonio do Concello de Ourense, Sonia Ogando; e o concelleiro de Infraestruturas, Mobilidade e Transporte do Concello de Ourense, José Miguel Caride; entre outros.
Estas distincións supoñen un recoñecemento ao labor “conxunto e tan necesario” de todos os axentes – arquitectos, promotores, aparelladores, construtores e demais colaboradores– que interveñen no proceso de xestación e construción dunha obra de arquitectura de calidade desenvolta nas demarcacións de Pontevedra, Vigo e Ourense. O obxecto do certame é destacar o valor da obra arquitectónica, unha “pequena pero importante aportación á arquitectura, á creación e á posta en valor da contorna”.
Este ano presentáronse 75 proxectos (40 propostas executadas na demarcación da delegación de Vigo, 24 na de Pontevedra e 11 na de Ourense) de moi diversas escalas e localizacións, que son o resultado que aglutina o mellor dos arquitectos e das arquitectas, pero tamén de todos os axentes de obra que os acompañan no proceso construtivo, como son os aparelladores, promotores, enxeñeiros, construtores e mesmo artesáns da madeira ou do metal.
O xurado valorou a totalidade dos proxectos presentados e os aspectos concretos que aportan un carácter ou valor singular pola súa tipoloxía, innovación tecnolóxica, baixo custo ou implantación no territorio. Finalmente, seleccionou como gañadoras 14 obras, e mostrou a súa satisfacción ao corroborar o incremento de obras presentadas respecto doutros anos, e a constatación da gran calidade de todas elas, que premiadas ou non, son “testemuño do bo facer, do talento e do esforzo agochado tras cada traballo”.
Proxectos premiados
-Rehabilitación de edificio para vivenda unifamiliar
Rúa Ferrería 8, Vigo
Ramón Viéitez Rodríguez e Alberto Cebral Loureda
Pola habilidade na incorporación da luz cenital como elemento conformador da vivenda, coa dificultade engadida da mínima e singular morfoloxía da parcela nun contorno moi consolidado dun casco histórico.
-Stand Navaliber
Navalia 2018
Pablo Menéndez Paz
Pola uso da cor como elemento identitario pero sen renunciar á elegancia que aporta unha malla estrutural que xoga co perfecto equilibrio entre contundencia e fraxilidade.
-Clínica Javier Fernández Ulloa
Rúa Colón, nº 3, Vigo
Pablo Menéndez Paz
Pola súa linguaxe perfectamente integrada na fachada do edificio preexistente, e pola elegancia e acerto no deseño de todos os elementos arquitectónicos e icónicos que conforman o proxecto.
-Vivenda unifamiliar DVL
Urbanización Pazo de Ramirás, 39. Ourense
Manuel Jorreto Díaz
Pola súa correcta implantación no lugar, dando unha elegante solución a unha topografía de forte pendente, así como pola súa serena e contundente solución volumétrica, cunha materialidade adecuada ao seu contorno.
-Restauración da Fonte da Torre
Caldas de Reis. Pontevedra
José Luis Gil Pita
Pola seu respectuoso tratamento dun elemento patrimonial e histórico e pola acertada incorporación e posta en valor dos oficios tradicionais na intervención.
–Centro de actividades de montaña con aloxamentos
Lugar de Frinxo, Tui
Alfonso Salgado Suárez e Francisco Xabier Liñares Túñez. Salgado e Liñares, SLP
Pola correcta integración no lugar de todo o conxunto edificado, tanto as novas construcións como os volumes rehabilitados, nun equilibrio perfecto entre volumetrías tradicionais e materialidade, o que permite a posta en valor do contorno.
-Vivenda unifamiliar
Lugar Cortiñas de Abaixo, Corbillón. Cambados
Francisco Galiñanes Chaves
Por conquistar unha relación perfecta entre interior e exterior, cun uso moi acertado dos patios, dos materiais e da luz, perfectos protagonistas e artífices da serenidade e contundencia desta vivenda.
-Edificio Faraday
Etea, Vigo
Elizabeth Abalo e Gonzalo Alonso. Abalo Alonso Arquitectos
Polo respectuoso trato da arquitectura preexistente, nun exercicio de intencionadas contencións, así como pola eficacia funcional do programa proposto.
-Reforma interior de piso de grandes dimensións
Rúa Marqués de Valladares, Vigo
David Vázquez García
Pola acertada optimización do espazo cunha habilidosa organización das dúas vivendas, dotándoas dun programa máis contemporáneo do preexistente, así como pola actualización das envolventes que favorecen un maior confort e aforro enerxético.
-Vivenda unifamiliar aillada
Irmáns Noia Xil, esquina rúa O Rosal s/n. A Guarda
Xavier Pousa Arbones
Pola habilidosa resolución do programa nunha parcela de complicada topografía e morfoloxía, así como polo agradecido uso dos materiais e solución de fachada.
-Casa para un artista
Rúa Vista Alegre, Vigo
María Pilar González Ferro e Jordi Castro Andrade. Castroferro Arquitectos
Pola súa proposta que, desposuída de complexos, recupera os vellos elementos construtivos e fai deles parte da nova coreografía, na que unha construción directa e sincera, fai que a casa adquira unha nova identidade chea de significado.
-Parque arqueolóxico da arte rupestre
Campo Lameiro, Pontevedra
Alberto Redondo Porto, José Martín Valladares Durán e Marcial Rodríguez Rodríguez. Redondo Valladares y Rodríguez SLP
Por tratarse dunha obra que ten demostrado a súa exquisita pervivencia no tempo, cun uso destacado da pedra como material da fachada, pero resolto cunha singular solución que lle outorga ao edificio unha tectónica afastada dos convencionalismos, pero á vez moi vencellada á tradición e contorno na que se encadra.
-Rehabilitación de vivenda tradicional
Lugar de Pousada. Parroquia de Callobre, 3. A Estrada, Pontevedra
Alberto Redondo Porto, José Martín Valladares Durán e Marcial Rodríguez Rodríguez. Redondo Valladares y Rodríguez SLP
Por ser exemplo da posta en valor da arquitectura tradicional desde a sensibilidade no uso dos materiais, a contención no emprego de novos elementos e o respectuoso uso das volumetrías preexistentes.
-Zenvisión
Tui, Pontevedra
Jorge Enríquez Méndez
Pola firme aposta no uso dun material único que permite a resolución de moitos dos elementos que requiría o programa, e por demostrar á perfección a importancia e peso da estratexia proxectual no éxito final dunha obra, máis alá dos condicionamentos orzamentarios.
