Entre 70 e 80 profesionais -optometristas, oftalmólogos, farmacéuticos e voluntarios- desprázanse desde distintos lugares de España de forma desinteresada para realizar esta acción solidaria, da que se beneficiarán sobre medio millar de persoas con discapacidade intelectual de distintas asociacións de discapacidade e enfermidade mental de Galicia.
Os beneficiarios serán atendidos en grupos dun máximo de sete persoas, que pasarán polas estacións dispostas no percorrido. Os profesionais irán desenvolvendo a revisión por fases, realizando probas de visión, saúde mental e auditiva e hixiene ocular.
‘Vén e verás’ é un conxunto de accións solidarias que periodicamente desenvolve a asociación Abre Sus Ojos cun colectivo vulnerable, neste caso con persoas con diversidade funcional (discapacidade intelectual, enfermidade mental…) e/ou grupos en risco de exclusión social.
O obxectivo do proxecto é a prevención, detección e atención de posibles problemas visuais e auditivos. Para este ano, os organizadores elixiron Vigo como sede da súa acción.