Trátase dun servizo ao que pode acceder o público xeral, pero teñen preferencia os fillos e fillas dos traballadores do Servizo Galego de Saúde no hospital ou noutros centros do Sergas da EOXI de Vigo. O seu horario inicial será de 07.30 a 16.00 horas de luns a venres os días laborables. En función da demanda estudaríase ampliar a xornada ata as 19:00 horas.
A posta en marcha deste novo servizo non asistencial vincúlanse á segunda liña de acción prioritaria do Plan Estratéxico da EOXI de Vigo, que leva por título: “Coidado, Desenvolvemento e Recoñecemento dos e das profesionais”, e que aposta pola conciliación laboral e familiar do persoal.
Merlín, xestionada pola Escola Infantil Papaventos, está emprazada no andar 0 da vela A e conta cunha entrada específica e independente do hospital. Dispón dunha superficie de 283 metros cadrados, ademais dun patio de xogos exterior. Estas instalacións contan con catro aulas con seguintes niveis educativos: unha aula de 0-1 anos con capacidade para oito bebés; unha aula de 1-2 anos para trece nenos e nenas; e dúas aulas de 2-3 anos con capacidade para vinte pequenos cada unha.
As clases están preparadas para ser polivalentes, é dicir, que se a demanda nun tramo de idade é superior a outro, pódense adaptar para eses nenos e nenas, tanto no mobiliario como nas prestacións específicas ou os xogos.
Completan este dispositivo unha sala polivalente, catro aseos, espazo específico para carros, recepción, etcétera. Entre as súas prestacións, oferta tamén servizo de comedor.
En canto ao equipo docente fixo, está integrado por un mestre de Infantil e catro técnicos superiores de Educación Infantil.
Criterios de admisión
No caso de resultar máis solicitudes que prazas, a administración ten fixados os seguintes criterios de admisión: en primeiro lugar, terán preferencia os fillos e fillas dos traballadores do Sergas destinados no hospital Álvaro Cunqueiro; a continuación os do Sergas do resto dos centros da EOXI de Vigo; séguenlle o resto de persoal que traballa nas instalacións do Álvaro Cunqueiro e, finalmente, o público xeral.
O proxecto educativo que ofrece Merlín foi previamente aprobado pola administración, e inclúe, entre outros aspectos, un traballo educativo desenvolvido mediante criterios de integración que permitan admitir e atender nenos con discapacidades físicas, psíquicas e/ou sensoriais.