Eles serán os únicos representantes do Val Miñor nunha competición que arrinca mañá sábado e que se estende ata o domingo 19 de xuño coa participación de 5.000 deportistas de 30 países e 15.000 visitantes. Con este campionato o corpo policial estréase nunha competición deportiva a nivel internacional (existen tamén Olimpíadas e Mundiais deste perfil).
«É un orgullo que Nigrán estea presente nun evento que reúne a miles de participantes de todo o continente. Os nosos axentes prepáranse día a día para poder desempeñar as súas funcións con orgullo e capacidade e ofrecen unha imaxe moi positiva do noso municipio nun campionato que ademais de fomentar a práctica deportiva transmite valores como a fraternidade e o compañeirismo», sinalou o alcalde, Juan González, na súa despedida esta mañá desde a casa consistorial, á que acudiu tamén o edil de Seguridade Rubén Rial.
Os seis axentes, de idades comprendidas entre os 35 e 40 anos (de esquerda a dereita na imaxe), son Ubaldo Rodríguez, Montxo Hermida, Santiago Pereira, Borja González, José Manuel Vázquez e José Luís Garrido (este último non está na foto porque partía desde Pontevedra). Competirán en sete disciplinas diferentes: un en natación, dous en atletismo, dous en ciclismo, dous en BTT, dúas parellas en Biathlon (correr unha milla, efectuar 12 diparos a unha distancia de 25 metros, correr unha segunda milla, volver a efectuar outros 12 disparos e por ultimo correr unha terceira milla), dúas parellas en Duathlon e un equipo de tres en Triathlon.
«Cada un de nós ten bagaxe nas disciplinas nas que imos participar, así que decidimos levar a nosa afección individual ao ámbito público para representar así a Nigrán nunha competición deste tipo por vez primeira na súa historia», sinala o inspector xefe José Manuel Vázquez, quen o pasado fin de semana logrou o bronce no Campionato Galego de Natación Máster de Verán. Vázquez é o único que xa participou en competicións internacionais sendo axente local en Vigo, unha experiencia que describe como «moi positiva» e que trasladou aos outros cinco axentes de Nigrán que agora se estrean.
A presenza da Policía Local nos Xogos é posible grazas á colaboración do Concello e dos patrocinadores privados Pescapuerta e Marine Instruments. Así mesmo, o Club Ciclista Rías Baixas colabora prestando os remolques cos que trasladan as oito bicicletas que empregarán nas diferentes probas.
Os Xogos Europeos iniciáronse en 2006 na cidade de Pontevedra. Desde entón celébranse cada dous anos nunha localidade europea diferente, de maneira alterna cos Mundiais. Desde o seu inicio, o número de participantes en cada edición foi crecendo de forma ininterrompida, ata o punto de que, a nivel mundial só ven superados en índices de participación, de número de deportes e de repercusión económica polos Xogos Olímpicos e polos Xogos Mundiais de Policías e Bombeiros. Nos Xogos participan policías, bombeiros e membros da administración penal e das aduanas de numerosos países europeos.
