A partires do próximo luns día 30 de xuño, farase efectiva a integración funcional dos tres equipos fixos desta Unidade, un emprazado no Meixoeiro e outros dous no Hospital Alvaro Cunqueiro, baixo a dependencia da xefatura do servizo de Radiodiagnóstico do Chuvi, ostentada polo doutor Xan Vieito Fuentes. Pola súa banda, Galaria seguirá mantendo a Dirección técnica da Unidade, a cargo da doutora Mercedes Arias.
Neste senso, o luns, o xerente do Sergas, Antonio Fernández Campa, manterá unha xuntanza cos profesionais de ambas organizacións, Galaria e EOXI, para explicarlles máis en profundidade -dado que xa foron informados polos seus responsables- dos detalles técnicos deste novo modelo organizativo.
Segundo informou o Sergas, a apertura do Hospital Álvaro Cunqueiro e a dotación de novos equipamentos tecnolóxicos- especialmente a nova resonancia de 3 Teslas, un TAC de 128 cortes e un mamógrafo de tomosíntese- propiciou esta integración, coa finalidade de mellorar a atención radiolóxica aos pacientes da área de Vigo. «O obxectivo esencial é a procura dunha atención radiolóxica secuencial e integrada de alta calidade, con gran satisfacción dos seus profesionais, e que permita ademais un elevado nivel científico e docente acorde cun hospital de III nivel», apunta.
«Con este modelo aprovéitanse mellor as sinerxias das dúas organizacións, sumando os seus recursos e a experiencia dos seus profesionais, para acadar un servizo aínda máis eficiente. Isto reportará importantes beneficios tanto para os pacientes como para os profesionais, e posibilitará a creación dun gran servizo de referencia para a área sur de Galicia», sinala o Sergas.
Vantaxes para aos pacientes
Trátase de ofertar a mellor calidade asistencial posible aos usuarios e de mellorar a utilización dos recursos do sistema sanitario público.
Unha das vantaxes concretas desta integración é que permitirá que os diagnósticos sexan integrados; isto é, unificarán toda a información dispoñible das distintas técnicas radiolóxicas empregadas no estudo dun paciente. Así, un mesmo radiólogo estará capacitado para informar indistintamente sobre calquera das técnicas, moitas veces complementarias, o que producirá un diagnóstico integral.
Oportunidades profesionais
Ata agora, os profesionais desta Unidade de Galaria víñanse dedicando unicamente á técnica da Resonancia Magnética, mentres que os da EOXI traballaban coas técnicas integradas, agás a RM.
En determinados procedementos diagnósticos, e especialmente nos complexos, que un mesmo profesional, ou grupo de profesionais, aplique as distintas técnicas de xeito secuencial constitúe unha mellora importante, xa que a información recibida dos diferentes estudos radiolóxicos é complementaria. Por isto, é necesario aproveitar a súa experiencia nun determinado procedemento, pero tamén contemplar o seu desenvolvemento profesional para o manexo conxunto das distintas técnicas radiolóxicas.
Ao ofrecer aos radiólogos das dúas organizacións a posibilidade de ter o mesmo acceso a todas as técnicas, este novo modelo posibilita así ese desenvolvemento profesional, e ofértalles novas expectativas e oportunidades en todos os campos, asistencial, docente e investigador.
Mil estudos radiolóxicos diarios
O servizo de Radioloxía da EOXI de Vigo realiza unha media de 1.083 estudos radiolóxicos diarios, dos que un 33 por cento son procedementos radiolóxicos complexos .
Os últimos datos revelan que anualmente efectúan 395.434 probas radiolóxicas, das que 51.850 son ecografías; 42.640 TACs (tomografía axial); 5.341 procedementos vascular-intervencionista; 10.105 estudos de mama; e 281. 203 placas convencionais, entre outras. Pola súa banda, a Unidade de Resonancia Magnética realiza no Chuvi 25.578 estudos anuais.
En canto aos recursos tecnolóxicos e humanos, no momento actual, o Complexo Hospitalario de Vigo dispón dun total de 57 salas de radioloxía – 10 salas de radioloxía convencionais; 10 de radioloxía dixital; 2 de telemando; 3 salas de radioloxía intervencionista; 3 salas de radioloxía vascular; 18 ecógrafos, 6 equipos de TC – atendidas por 54 radiólogos, 78 técnicos de radioloxía, 17 profesionais de enfermería, 27 celadores e 6 auxiliares administrativos .
A partires do luns, ao incorporase os tres equipos de Resonancia Magnética, o CHUVI disporá dun equipo humano de 200 profesionais, composto por 63 radiólogos, 85 técnicos, e 19 profesionais de enfermaría, entre outros. Isto que lle sitúa como un dos servizos máis potentes a nivel nacional, tanto polo dimensionamento dos seus recursos humanos como polo volume de actividade realizada.
Ademais, os profesionais de ambas organizacións gozan de gran prestixio a nivel da comunidade científica nacional e internacional, polo que trátase de axuntar esa calidade e proxectala á creación dun gran servizo único de referencia na área sur de Galicia.