En Manila, onde ostentaba o cargo de Comandante Xeneral do departamento marítimo das illas Filipinas, falece o destacado mariño vigués D. Santiago Durán y Lira. Nacera na nosa cidade no ano 1824 e era membro dunha distinguida familia, de antigo raizame local.
Foi ministro da Mariña en 1875 e, por non querer aceptar a base 11 das novas ordenanzas, relativa á tolerancia relixiosa, dimitiu ao ano seguinte, pasando entón ao mando da Escuadra de Instrución, como Comandante Xeneral. Neste posto visitou coa escuadra o porto de Vigo a finais de 1876 e volveu novamente en agosto de 1877 para albergar na fragata insignia, Victoria, a don Afonso XII coa ocasión da primeira viaxe deste monarca a Vigo. A finais dese mesmo ano aceptou outra vez a carreira de Mariña, que desempregou tan só até o 8 de xaneiro seguinte, xa que o seu carácter se aviña mal coas esixencias da política. Durán y Lira foi ademais ministro do Concello Supremo da Armada, Conselleiro de Estado e, como temos dito, Comandante Xeneral da Escuadra de Instrución. Estaba en posesión de varias grandes cruces e outras condecoracións. Foi home modesto e íntegro, que rexeitou honores e cargos por vincularse máis estreitamente á súa profesión.
21 de novembro de 1881. Xosé María Álvarez Blázquez. «A Cidade e os Días. Calendario Histórico de Vigo» (Xerais, 2008)
