Un empurrón para a ansiada construcción do ferrocarril a Ourense é a proposición presentada con esta data polo ministro de Fomento, en cumprimento do seu convenio coas deputacións provinciais, para levar a cabo no prazo inmediato a poxa das obras e a subseguinte explotación.
“Excusado cremos manifestar a nosa satisfación por tan agradable nova, que vemos confirmada nos xornais da Corte; esta colma todas as nosas aspiracións e desexos e dános a seguridade de ver realizadas todas as nosas ambicións”.
“A poxa que vai anunciarse abre o campo para que todos aqueles que en repetidas ocasións manifestaron e ofreceron a riseira perspectiva de pingües beneficios nesta obra, se presenten para solicitalos ou para traballar para que os seus amigos os soliciten; esta é a ocasión para os que tantas veces aseguraron qe sobraban capitais que puidesen dedicarse á construción do noso ferrocarril, que dediquen todos os seus esforzos para que haxa a maior concorrencia posible de licitadores”.(Faro de Vigo, 3-XII-1862).
As obras comezaron, como xa rexistramos, o 23 de xuño do ano seguinte na praia de Guixar con grande pompa e desbordado entusiasmo popular.
25 de novembro de 1705. Xosé María Álvarez Blázquez. «A Cidade e os Días. Calendario Histórico de Vigo» (Xerais, 2008)
