“Como Goberno de todos os galegos seguiremos a apostar por Vigo e polo seu futuro, cunha Área Metropolitana con mellores servizos, cunha Cidade da Xustiza, cunha estación intermodal e con novas actuacións no Casco Vello», asegurou Feijóo durante o acto do aniversario. As autoridades fixeron un percorrido pola zona alta do Casco Vello e visitaron algúns espazos, locais e vivendas rehabilitadas polo ente, do que forma parte a Xunta, ao 90%, e o Concello de Vigo, con 10% restante.
Feijóo aseverou, así, que a Xunta seguirá apostando pola colaboración leal e a busca concertada de respostas que permitan alumear éxitos para os vigueses: “Como apostamos para poñer en marcha antes do verán a Área Metropolitana que contribuirá a mellorar os servizos e a atención aos cidadáns; como buscamos sen descanso a vía para materializar por fin a Cidade da Xustiza; como queremos avanzar xuntos para que o antes posible esta cidade teña a estacións intermodal que merece; como queremos colaborar para poder responder a todas e cada unha das familias de Vigo que teñen dificultades para exercer o seu dereito á vivenda; como conseguimos impulsar a maior depuradora do país, que garantirá a calidade das augas da ría por primeira vez e de forma completa; e como puxemos a disposición a maior infraestrutura sanitaria feita por un Goberno da Xunta e en plena recesión económica”.
40 edificios rehabilitados
No tocante ao Consorcio do Casco Vello, o presidente autonómico lembrou que hoxe máis de 40 edificios rehabilitados, case 100 vivendas recuperadas e ocupadas por familias e máis de 25 locais comerciais habilitados fan que o Casco Vello comece a ser de novo un espazo de dinamismo central nese gran latexo social, cultural e comercial que é a cidade olívica.
“Vemos, pois, na recuperación do núcleo histórico un exemplo da proverbial resistencia desta cidade contra toda forma de derrota. E vémolo tamén na forma”, dixo, incidindo en que o modo en que casas rehabilitadas combinan en harmonía un escrupuloso respecto pola tradición coa perspectiva arquitectónica máis contemporánea, mostran o entusiasmo co que se afronta esa valiosa tarefa de restitución da dignidade urbana.
Así mesmo, o responsable da Administración autonómica expresou o seu convencemento de que é sobre todo na unión de vontades que se agocha tras a posta en valor do Casco Vello, onde se evidencia que para superar con éxito os seus maiores desafíos, esta cidade escolleu sempre a suma de forzas. Non en van, a través do Consorcio Casco Vello de Vigo, “impulsamos ducias de actuacións e destinamos os recursos necesarios para acometelas: máis de 30 millóns de euros; sen dúbida, o maior investimento da historia da Xunta, feito nun casco vello”.
“E debemos seguir traballando, como faremos, coa recuperación de 30 novas vivendas e 11 locais comerciais”, avanzou.
Obra colectiva
Máis alá da dimensión institucional, Feijóo afirmou que a recuperación do Casco Vello de Vigo é unha obra colectiva porque foi a propia cidade, as persoas que a compoñen, as que se revelaron contra a súa perda, “e son elas as que agora, coa súa resposta, lle dan verdadeiro sentido ao traballo feito”.
“Falo dos veciños que ocupan as vivendas rehabilitadas; dos emprendedores que apostan polo núcleo histórico para poñer en marcha negocios que se distinguen pola vangarda e a calidade; falo do Colexio de Arquitectos de Galicia, que desde a delegación local traballa coa maior das implicacións para acadar que Vigo se enorgulleza outra vez do seu Casco Vello; ou da Universidade, que decidiu tamén ser parte deste proxecto e instalarse nos edificios cedidos polos Consorcio no Berbés”, dixo.
O titular da Xunta concluíu a súa intervención salientando que dez anos despois volve imperar a unidade.“Ese é, de novo, o camiño que permite superar a encrucillada e esquivar o bloqueo que a nova situación urbanística impuña aos grandes proxectos para o progreso desta cidade. Alá eles os que queiran permanecer á marxe e remar contra corrente”, abundou.
Abel Caballero
Pola súa banda, Abel Caballero engadiu que os 30 millóns adicados ao casco histórico vigués polo seu goberno son «cifras moi significativas da nosa acción», e nomeou a Pinacoteca, as humanizacións, a UNED e os Coidadores de Barrio, entre outras.
Durante o acto, o rexedor apuntou que o Casco Vello é «o noso corazón e a nosa alma» e «asistimos a un reverdecer e un reencontro da cidadanía con esta zona» que, ao seu entender, «ten que seguir sendo unha gran bandeira» da cidade coa «contribución de todos» e apelou a ese traballo conxunto para seguir percorrendo o camiño e abordar «retos colectivos de futuro» como a fachada do Berbés, o barrio do Cura ou a Panificadora.
30 millóns de euros
En declaracións previas, Caballero afirmou que «estamos encantados» de celebrar o aniversario do Consorcio -creado no 2005- e engadiu as «cifras moi significativas da nosa acción» na zona vella da cidade: 30 millóns de euros investidos polo goberno de Vigo baixo o seu mandato.
Neste aspecto, o alcalde salientou melloras como as humanizacións, as escaleiras mecánicas, o aforro enerxético, a Pinacoteca, a sede da UNED, o Centro de Arte Fotográfica, as medianeiras ou a adecuación da muralla do Castro. «Soamente os Coidadores de Barrio, medio millón de euros ao ano», exemplificou Caballero.
