«O novo Hospital Álvaro Cunqueiro atópase en situación deficitaria no número de camas dispoñibles ante a imposibilidade de seguir desdobrando habitacións pola falta dun stock suficiente, o que deriva en que un gran número de pacientes teñan que ser ingresados en plantas alleas a súa patoloxía (pacientes periféricos)», apunta a CIG nun comunicado.
O sindicato explica que esta situación mostra «a realidade dun centro que naceu cun gran recorte no número de habitacións dispoñibles facendo na realidade imposible xeneralizar as habitacións individuais nos momentos de máis ingresos e, o que aínda é máis grave, sendo irreal a previsión de desdobramento destas ao non dispor dun stock suficiente para facelo».
Pola súa banda, o Sergas emitíu un comunicado no que sinala que o servizo de Urxencias do Álvaro Cunqueiro está a funcionar «con absoluta normalidade, dando resposta axeitada ao incremento da demanda producido por mor do incremento da patoloxía respiratoria estacional. Os pacientes son atendidos segundo a prioridade establecida na triaxe, de tal xeito que os pacientes con patoloxía urxente non esperan nunca».
«Os datos da actividade asistencial realizada na EOXI de Vigo no pasado ano, reflicten que continúa diminuíndo o número de Urxencias hospitalarias que acoden ao hospital, fundamentalmente as de adultos. En paralelo, segue o ritmo ascendente das urxencias extrahospitalarias atendidas nos Puntos de Atención Continuada (PACs)», apunta o Sergas.