O rexedor deu conta esta mañá do envío ao ministro de Cultura, Íñigo Méndez de Vigo, dunha carta que recolle a proposta «razoada e fundamentada» de construír a Biblioteca do Estado nos terreos municipais da rúa Lalín. Ese espazo, expropiado polo Concello para que a Xunta construíra a Cidade da Xustiza antes de que decidira levala ao antigo Xeral, conta con 6.000 m2 de planta e ten un valor de 5 millóns de euros que o Concello cedería gratuitamente.
O Concello propón a sinatura dun convenio polo que o Goberno tería que incluír nos próximos orzamentos unha partida de 350.000 ou 400.000 euros. A partir de aí, a través da Lei Vigo se realizaría a tramitación urbanística precisa e a biblioteca podería estar construíndose nun ano. En declaracións aos medios, Caballero criticou a opción da Xunta cunha proposta que non arrancaría ata despois das eleccións autonómicas e xerais polo que se «trata dunha tomadura de pelo porque poden cambiar os gobernos».
