O Bloque Nacionalista Galego anunciou este luns en Vigo que levará ao Congreso dos Deputados a demanda de que se instalen barreiras acústicas ao paso da AP-9 polo barrio de Teis. O concelleiro do BNG na cidade olívica, Xabier P. Igrexas, facíao público despois de coñecer a intención de Audasa de instalar pantallas redutoras de ruído no tramo que une Vilaboa e Chapela.
“O BNG imos levar esta histórica demanda da veciñanza de Teis ao Congreso, a través dunha iniciativa que formulará con carácter urxente o noso deputado Néstor Rego, para urxir do Goberno español un compromiso claro nesta cuestión e esixir da concesionaria que actúe”, explicou o portavoz municipal nacionalista.
Igrexas advertiu de que sería “inxustificábel” que “a veciñanza de Teis e de Vigo volva ser ignorada por Madrid e por Audasa”. “O barrio de Teis non pode continuar a padecer estes niveis de contaminación acústica”, reclamou, defendendo que a instalación de barreiras acústicas pode ser unha solución eficaz entrementres non se resolve a conversión en vía urbano de todo o tramo da AP9 que discorre desde as Torres de Padín até o centro da cidade. Unha actuación que fica pendente tanto do seu encaixe no plan urbanístico como dun acordo co Ministerio de Transportes.
“O trazado da AP-9 tronzou Teis e supón grandes prexuízos para as veciñas e veciños. É hora de comezar a corrixilos”, remachou.
