“Eroski, escoita, estamos en loita”, “Traballo temporal, terrosimo patronal” ou “Despedidos readmisión” foron as consignas que máis se berraron durante o percorrido entre a praza de Fernando O Católico e o mercado do Progreso. A manifestación, na que participou o secretario comarcal da CIG-Vigo, Alberto Gonçalves, e a secretaria comarcal da federación de Servizos, Transi Fernández, arrincou diante do Eroski situado na zona e rematou ás portas do supermercado Familia situado no mercado do Progreso.
Ao final da protesta, unha traballadora tomou a palabra para denunciar que a cadea de supermercados rescindiulles o contrato a nove empregados nos últimos meses -para o que botou man da reforma laboral do Partido Popular- co obxectivo de desfacerse do persoal fixo e con antigüidade, afondando así na situación de precariedade que se padece na empresa.
“Aplican a reforma laboral do PP para desfacerse dos empregados con máis tempo na empresa para seguir a contratar traballadores a tempo parcial, aumentando así a precariedade e pagando salarios de miseria”, indicou. Diante disto, reclámanlle á empresa que dea marcha atrás e readmita a todos os traballadores despedidos.
«Sen motivos xustificados»
Segundo criticou, Eroski aduce causas obxectivas para levar a cabo a rescisión dos contratos “cando non existen motivos xustificados”. Ademais, censurou que a decisión se adoptase sen nin sequera ter en conta a opinión dos delegados da CIG no comité, “que entenden que non hai nada que xustifique a medida”.
Finalmente, sinalou que a maioría do comité -“formada por delegados de sindicatos amarelos como Fetico”- mira cara a outro lado mentres consenten que se despida a compañeiros. “Unha empresa que factura millóns de euros non pode despedir deste xeito, polo que temos que impedir que boten á rúa a traballadores que o único que fixeron toda a súa vida foi traballar para gañar o seu salario dignamente”.
