A Confederación Galega de Persoas con Discapacidade (Cogami) iniciou nas instalacións que ten en Vigo, no barrio de Navia, un curso de almacén e carretilla no que se están a formar quince persoas con certificado de discapacidade ou con certificado de incapacidade laboral para a profesión habitual.
Cofinanciado pola Fundación La Caixa e o Fondo Social Europeo, este curso forma parte do programa de inserción laboral Máis Emprego, dirixido a persoas con discapacidade e/ou con incapacidade laboral empadroadas na provincia de Pontevedra e con idades comprendidas entre os 18 e os 62 anos.
Co fin de favorecer o acceso ao mercado laboral por vez primeira ou de realizar unha reciclaxe, esta formación conta cunha duración de 120 horas, das que 50 horas serán impartidas en clases teóricas e 70 horas serán realizadas como prácticas en empresas.
O alumnado está composto por catro mulleres e once homes procedentes dos concellos de Vigo, Gondomar, Tomiño, Salvaterra e A Guarda, con idades comprendidas de entre 35 e os 57 anos. Realizarán unha formación básica de almacén e ofimática relacionada coa xestión do almacén e poderán obter o carné de carretilla segundo a normativa UNE 2016.
Para rematar, a formación práctica vai ser realizada en empresas da súa zona de residencia habitual, de cara a facilitar o contacto directo co tecido empresarial da zona parara facilitar unha pronta inserción.
