Que estudantes, persoal docente e investigador e persoal de administración e servizos que diariamente se despraza aos campus de Vigo, Ourense e Pontevedra, viaxen xuntos, co conseguinte aforro de cartos e de emisións de CO2, é o obxectivo da iniciativa Comparte Coche, á que a UVigo acaba de sumarse, segundo anunciou este xoves a institución no Diario da Universidade de Vigo (DUVI).
A través da aplicación gratuíta Hoop Carpool, condutores e pasaxeiros poden entrar en contacto para compartir os seus traxectos habituais en coche, promovendo a mobilidade sostible e a optimización da ocupación dos vehículos.
“A posta en marcha deste proxecto pretende facilitarlle a toda a comunidade da UVigo a posibilidade de coñecer a outros membros para que poidan compartir coche nos seus desprazamentos do día a día aos campus. E desta forma, compartan gastos, aforren tempo e eviten emisións contaminantes”, sinalan os promotores da iniciativa, cos que a Universidade de Vigo asinou un acordo para implantar o vehículo compartido.
“Como consecuencia do uso da aplicación Hoop Carpool espérase que durante o curso 2022-2023 se consiga que se aforren 25.200 quilos de CO2 e que as persoas usuarias compartan gastos. Con iso xérase un aforro de case 45.000 euros e máis de 54.000 horas”, explican os promotores, que destacan que outras 11 universidades públicas e privadas españolas xa se sumaron con anterioridade a esta iniciativa.
O alumnado, PDI e PAS da UVigo terá ocasión de coñecer de primeira man a campaña #UVigoComparteCoche entre os días 22 ao 24 de novembro, en cada un dos tres campus, nos puntos de información que Hoop Carpool habilitará en diferentes lugares. No campus de Ourense localizarase o martes 22, entre as 11.00 e as 14.00 horas na Facultade de Turismo; en Pontevedra, será o mércores 23 de novembro, en horario de 10.00 ás 14.00h, na Facultade de Ciencias Sociais e da Comunicación e ao campus de Vigo chegará o xoves 24 de novembro, de 11.00 ás 14.00h, na área comercial.
